Türkiyədə növbədənkənar seçkilərlə bağlı məsələ yenidən gündəmdədir. Müxalifət seçkilərin daha tez keçirilməsini istəyir, hakimiyyət isə gündəmdə seçkinin olmadığını bəyan edib.
Qeyd edək ki, Türkiyədə parlament və prezident seçkiləri 2023-cü ildə keçirilib, növbəti seçkilərin 2028-ci ildə baş tutması gözlənilir.
Müxalifət daxilində namizədin müəyyənləşdirilməsi ilə bağlı müzakirələr aparılır. Cümhuriyyət Xalq Partiyasının (CHP) sədri Özgür Özəl bir neçə gün əvvəl CHP-nin prezidentliyə namizədinin müəyyən edilməsi üçün yol xəritəsini açıqlayıb. O, namizədin müəyyənləşdirilməsi üçün partiya daxilində səsvermənin keçiriləcəyini bildirib.
"İstanbulda bir sıra görüşlər keçirdik. Həmin görüşdə Əkrəm (İmamoğlu) başqanla və Mansur (Yavaş) başqanla danışdıq və dəyərləndirdik. Artıq yeni bir başlanğıc, yeni bir dövrə birlikdə hazır olmaq mövzusunda razılıq əldə olunub", - Özəl deyib. CHP sədri hər iki siyasətçinin namizəd olmağa hazır olduğunu deyib və onlara təşəkkür edib.
Ancaq Mansur Yavaş namizədin indidən müəyyən edilməsinin problemli olacağını bildirib. Onun yaxın çevrəsi mətbuata açıqlamasında Yavaşın səsverməyə qarşı olduğunu bildirib.
Həmçinin, 2018-ci il prezident seçkilərində CHP-nin namizədi olan, daha sonra partiyadan ayrılaraq Məmləkət Partiyasını yaradan Muharrem İncenin da yenidən CHP-yə qayıdacağı bildirilir.
Modern.az sözügedən məsələlərlə bağlı CHP-nin sədr müavini İlhan Üzgel ilə həmsöhbət olub.
O, partiyasının növbədənkənar seçkilər keçirilməsini istədiyini deyib: "CHP olaraq növbədənkənar seçki istəyirik, bu mövzudakı tələbimizi hər platformda dilə gətiririk. İctimaiyyət bu mövzuda çox istəklidir, onlar mövcud problemlərin həllini növbədənkənar seçkilərdə görürlər. Partiya olaraq, növbədəkənar seçkilərə hazırıq".
İlhan Üzgel söyləyib ki, ən vacib nüans namizədi müəyyən etməkdir:
"Bununla əlaqədar 1,6 milyon üzvümüzlə ön seçim keçirib kimi namizəd görmək istədiklərini soruşacağıq. Muharrem İncənin CHP-yə qayıdışı ilə bağlı görüşlər davam edir. Nəticəni zaman içərisində görəcəyik. Partiya olaraq, namizəd müəyyən edərkən çox demokratik bir yol izləyirik. Həm partiyanın keçmişində son üç namizəd müəyyən edilərkən və digər partiyalarda bu mexanizm heç istifadə edilməyib. Sədrimiz "mən bunu namizəd kimi görmək istəyirəm" deyə bilərdi. Lakin demokratik üsul seçməyi üstün tutdu. Beləliklə, partiya üzvlərimizn seçimi əsasında Partiyanın Mərkəzi İcra Aparatı və Partiya Məclisi son qərarı verəcək. Bu prosesin bir ay yarıma tamamlanmasını gözləyirik".
Hakim Ədalət və İnkişaf Partiyasının deputatı Şamil Ayrım isə növbədənkənar seçkilərin gözlənilmədiyini bildirib.
