Türkiyənin Radio və Televiziya Şurası (RTÜK) həddən artıq neqativ xəbərlər yayımlayan media qurumlarına xəbərdarlıq edib.
Modern.az xəbər verir ki, bu barədə qurumun rəhbəri Əbubəkr Şahin özünün sosial media hesabında paylaşım edib.
O, qaydalara uymayan qurumlara sanksiyalar tətbiq ediləcəyini bildirib.
Açıqlamada bəzi media qurumlarının ölkədə müsbət hadisə olmadığına dair təsəvvür yaratmağa çalışdığı qeyd olunur. Bildirilir ki, belə xəbərlərlə vətəndaşlar bədbinlik və tənhalığa sövq edilir.
“Ölkəmizdə enerji, müdafiə sənayesi, yerli və milli texnologiya, incəsənət, mədəniyyət və idman da daxil olmaqla bir çox sahədə uğurlu işlər görünsə də, “yandıq”, “bitdik”, “məhv olduq” deyən bədbin jurnalistikanın heç kimə faydası yoxdur”, - qurumdan bildirilib.
RTÜK, həmçinin xəbər bülleteninin əsas aparıcılarına xəbərdarlıq edib, jurnalistlərin “hadisələr qarşısında öz siyasi baxışlarını ehtiva edən məqsədyönlü şərhlər və təhlillər apardıqlarını” bildirib.
Şura 6112 saylı qanun çərçivəsində sanksiyaların maksimum səviyyədə tətbiq ediləcəyi barədə xəbərdarlıq edib.
