Türkiyə mediasında müxalifətdə olan Cümhuriyyət Xalq Partiyasında (CHP) fikir ayrılıqlarının yarandığı barədə iddialar yayılıb. CHP sədri Özgür Özəl bir neçə gün əvvəl partiyanın prezidentliyə namizədinin müəyyən edilməsi üçün yol xəritəsini açıqlayıb. O, namizədin müəyyənləşdirilməsi üçün partiya daxilində səsvermənin keçiriləcəyini bildirib. 

Qeyd edək ki, partiyanın prezident postuna iki favorit namizədi var, onlar İstanbul bələdiyyə sədri Ekrem İmamoğlu və Ankara bələdiyyə sədri Mansur Yavaşdır.

Ancaq Mansur Yavaş namizədin indidən müəyyən edilməsinin problemli olacağını düşünür. Onun yaxın çevrəsi mətbuata açıqlamasında Yavaşın səsverməyə qarşı olduğunu bəyan edib. 

Modern.az xəbər verir ki, iddiaların yayılmasından sonra Özgür Özəl Ankarada Yavaş və İmamoğlu ilə görüş keçirib.

"Bir yerdəyik, hər zaman birlikdə olacağıq. Hər zaman birlikdə qalib gələcəyik. Türkiyə qazanacaq", - Özəl sosial media hesabında yazıb.

Ankarada Mansur Yavaşın ev sahibliyi etdiyi görüş 2,5 saat davam edib. Görüşün gündəliyi açıqlanmayıb.