ABŞ-nin Azərbaycandakı səfiri Mark Libbi yanvarın 18-də ölkəsinə qayıdıb. O, səhhətində olan problemlərlə əlaqədar vəzifəsini tərk edib.
Hələlik ABŞ-nin Azərbaycanda səfiri yoxdur. Əvvəllər ABŞ Azərbaycana səfir təyinatını müxtəlif səbəblərdən gecikdirib. Məsələn Mark Libbinin təyinatına qədər 1 ildən çox ABŞ-nin Azərbaycandakı səfirliyi başsız qalıb.
Qeyd edək ki, bundan əvvəl də ABŞ Azərbaycana səfir təyinatını gecikdirib. Buna səbəb kimi Senatda olduqca güclü təsirləri olan erməni lobbisinin fəaliyyəti göstərilir. 2009-cu ilin yanvarında ABŞ-ın Azərbaycandakı səfiri Enn Dörsinin səlahiyyət müddəti başa çatdı. Növbəti səfir Riçar Morninqstarın təyinatı bundan 3 il sonra təsdiqləndi.
Bu müddət ərzində Prezident Barak Obama Metyu Brayzanı Senatın icazəsi olmadan təyin etdi və bir ildən sonra Senat onun müddətinin uzadılmasına icazə vermədi. Erməni lobbisinin təsiri altında olan senatorlar Azərbaycan və Türkiyə ilə yaxın əlaqələri olduğu üçün Brayzanın səfir təyin edilməsinə razılıq vermədi. Erməni lobbisi ATƏT-in Minsk Qrupunun keçmiş amerikalı həmsədri olan Brayzanın həyat yoldaşının türk olmasını əsas gətirərək onun fövqəladə və səlahiyyətli səfir təyin edilməsinə imkan vermədi.
Modern.az-a danışan Milli Məclisin Beynəlxalq münasibətlər və parlamentlərarası əlaqələr komitəsinin üzvü Elçin Mirzəbəyli bildirib ki, ABŞ-nin Azərbaycana səfir təyinatının bu dəfə də uzanmasının heç bir əsası yoxdur:
“Tramp tərəfindən ABŞ-nin ölkəmizə yeni səfirinin təyin edilməsinin uzanması üçün heç bir mane yoxdur. ABŞ-nin hər iki palatasında respublikaçılar əsas söz sahibidirlər. Səfirin təyinatında, əgər o, prinsip etibarilə Azərbaycanda fəaliyyət göstərməyə layiqdirsə, iki ölkə arasında hər hansı problem yaratması ilə bağlı ehtimallar yoxdursa, onun təyinatında qənaətimə görə heç bir problem olmamalıdır. Tramp administrasiyası tərəfindən təyinat olarsa, qənaətimə görə, onun qarşısını almaq üçün heç bir ehtimal yoxdur”.
Deputat vurğulayıb ki, səfirin personası Azərbaycana uyğun olmasa, onu qəbul etməyə bilərik:
“Şübhəsiz ki, istənilən səfir öz ölkəsinin maraqlarını təmin edir. Onun ictimai-siyasi, mədəni həyatında iştirakı eyni zamanda həm də öz ölkəsinə divident qazandırır. ABŞ-nin bir-iki istisna olmaqla əvvəlki dövrlərdə Azərbaycanda fəaliyyət göstərən səfirləri kifayət qədər fəal olublar. Azərbaycan dövlət quyrumlarının müəyyən strukturları ilə əməkdaşlıq ediblər. İndiki halda hər şey Ağ Evin yürütdüyü siyasətdən asılıdır. Eyni siyasət səfir tərəfindən həyata keçirəcək. Mən bunun müsbət olacağını düşünürəm. Səfirlər müstəqil adamlar deyil ki, özləri istədikləri şəkildə qərarlar versinlər. Amma sədirin personası şübhəsiz ki, əhəmiyyətlidir. Səfirin personası hansı cəhətdənsə, Azərbaycana uyğun gəlmirsə, bu zaman həmi səfiri Azərbaycan qəbul etməyə bilər. Öncədən bu diplomatik yazışmalarla həll olunan məsələlərdir”.
