Rusiyanın işğalına qarşı müharibə aparan Ukrayna hərbi xidmətlə bağlı yeni addım atıb.
Modern.az xəbər verir ki, Ukrayna Müdafiə Nazirliyi 18-24 yaş arası kişilərin müqavilə ilə xidmətə qəbuluna başladığını elan edib.
Bu barədə hərbi idarənin saytında dərc olunan məlumatda deyilir.
“Ukrayna Müdafiə Nazirliyi rəsmi olaraq “Saziş 18-24” layihəsinə start verib”, - deyə bildirilib.
Dəyəri 1 milyon qrivna (təxminən 24 min dollar) olan müqavilə 1 il müddətinə imzalanır. Söz verilir ki, onun beşdə birini dərhal, qalanını isə bir il ərzində iki hissəyə bölməklə ödəyəcəklər.
Bundan başqa, müqavilə əsasında işləyən hərbçilərə 120 min qriven (2900 dollar) qədər aylıq əmək haqqı, “sıfır ipoteka krediti, dövlət hesabına təhsil, pulsuz tibbi xidmət, xüsusən də diş protezləri və bir illik xidmətdən sonra xaricə getmək hüququ” vəd edilir.
Qeyd olunur ki, müqavilə başa çatdıqdan sonra hərbi xidmətdən 12 aylıq möhlət veriləcək.
