ABŞ prezidenti Donald Tramp dünən Rusiya lideri Vladimir Putinlə telefon danışığından sonra Ağ Evin Oval kabinetində jurnalistlərin suallarını cavablandırıb.
Modern.az BBC-yə istinadən xəbər verir ki, Trampın Putinlə telefon danışığı zamanı razılaşdıqları ilk görüş Səudiyyə Ərəbistanında baş tutacaq.
Tramp Ukraynanın NATO-ya üzvlüyünün qeyri-real olması ilə bağlı müdafiə naziri Pit Heqsetlə razılaşdığını bildirib. O, bunun "praktiki olmadığını" söyləyib.
Eyni zamanda Tramp bildirib ki, ABŞ Ukraynaya yardımı davam etdirəcək, lakin bunun dəqiq necə olacağını açıqlamayıb.
Amerika prezidenti hesab edir ki, Ukraynada atəşkəs “çox da uzaq olmayan gələcəkdə” mümkündür.
