Son illərdə dünyanın bir çox ölkəsində cütlüklərin sayı azalır. İran, Meksika, Peru, Cənubi Afrika və Cənubi Koreya kimi fərqli bölgələrdə insanlar sevgili tapmaqda çətinlik çəkirlər.
Modern.az bu barədə BBC-yə istinadən xəbər verir.
Qeyd olunur ki, Çində 2014-cü ildə 13 milyon nikah bağlanmışdısa, 2024-cü ildə bu rəqəm 6 milyondan bir qədər artıq olub. Finlandiyada aparılan araşdırmalar isə birlikdə yaşayan cütlüklərin ayrılma ehtimalının ailə qurmaq ehtimalından daha yüksək olduğunu göstərir.
Braziliyanın Santa-Katarina şəhərində yaşayan 36 yaşlı Felipe sevgi tapmaq üçün müxtəlif üsullara baş vurduğunu, lakin heç vaxt ciddi münasibət qura bilmədiyini deyir. O, məktəbdə sevdiyi qızlara məktublar yazsa da, müsbət cavab almayıb. Universitet illərində dərs köməyi təklif edib, ancaq bu da nəticə verməyib. Hətta 30 yaşında psixoloqa müraciət edərək münasibətlər barədə məsləhət almağa çalışıb, amma yenə də uğur qazana bilməyib.
Mütəxəssislər qeyd edirlər ki, gənclər arasında yalnız vaxt keçirmək tendensiyası artır. ABŞ-da 18-24 yaş arasında olan kişilər vaxtlarının 60%-ni yalnız keçirirlər. Bu göstərici 20 il əvvəl fərqli idi – həmin yaş qrupu 30-40 yaşlı insanlarla eyni dərəcədə sosiallaşırdı. Lakin indi sosial media, video oyunlar və seriallar münasibət qurmağa mane olur.
Onlayn tanışlıq tətbiqlərinin populyarlığı da azalır. "Sensor Tower" araşdırma şirkətinin məlumatına görə, 2024-cü ildə ən məşhur 6 tanışma tətbiqinin yüklənmə sayı 18% azalıb. Arizona Universitetindən professor Liesel Şarabi hesab edir ki, istifadəçilər bu tətbiqlərdən yorulurlar və onların effektivliyinə inamları azalır. Həmçinin, tanışma tətbiqlərində qadın istifadəçilərin azlığı kişilərdə məyusluq yaradır.
Bəzi araşdırmalar göstərir ki, gənc qadınlar getdikcə daha feminist, gənc kişilər isə daha az proqressiv olur, bu isə münasibətlərdə uçurumu artırır. Mütəxəssislər internetin bu fərqləri daha da dərinləşdirdiyini düşünürlər.
Digər bir problem isə yalnız qalmağın artıq bir problem kimi qəbul edilməməsidir. Müasir dövrdə insanlar münasibətlərə vaxt ayırmaq əvəzinə serial izləməyi və ya video oyun oynamağı üstün tuturlar. Bu isə sosial münasibətlərin zəifləməsinə və kişilərlə qadınlar arasında emosional bağların qopmasına səbəb olur.
