Avropanın bir sıra ölkələri Rusiya ilə gələcək sülh sazişinin təmin edilməsinə kömək etmək üçün Ukraynaya qoşun göndərmək planı üzərində gizli şəkildə müzakirələr aparır.

Modern.az xəbər verir ki, bu barədə "Associated Press" agentliyi öz mənbələrinə istinadən yazıb.

Agentlik bildirir ki, avropalılar bu variantı təxminən bir il əvvəl nəzərdən keçirməyə başlayıblar, lakin ABŞ prezidenti Donald Trampın Rusiya ilə razılaşma əldə etmək istəməsi ilə bağlı narahatlıqlar fonunda müzakirələrin aktuallığı artıb.

Böyük Britaniya və Fransanın müzakirələrdə ən fəal olduğu bildirilir, lakin planın təfərrüatları məlum deyil. Estoniyanın müdafiə naziri Hanno Pevkur bildirib ki, Avropa İttifaqı (Aİ) üçün plan hazırlamazdan əvvəl Ukraynadakı təmas xəttinin necə görünəcəyini anlaması vacibdir.

Onun sözlərinə görə, əgər Rusiya və Ukrayna cəbhə xətti boyunca qüvvələrini hər iki tərəfdən “bir-iki min nəfərə” ixtisar etsələr, o zaman Avropa qoşunlarının mövcudluğunun təmin edilməsi “heç bir problem” olmayacaq, lakin “qaynar münaqişə” olarsa, vəziyyət daha da mürəkkəbləşəcək.

Agentlik yazır ki, Avropa kontingentinin böyüklüyü sülh sazişinin şərtlərindən asılıdır. Ukrayna prezidenti Volodimir Zelenski ən azı 100-150 min hərbçi olmasında israr edib. Media təxminən 30-40 min əsgərin olması barədə fərziyyələr irəli sürsə də, Avropa rəsmiləri bu rəqəmləri təsdiqləməyib.

Agentlik hesab edir ki, Aİ böyük miqyaslı qüvvə toplamaqda çətinlik çəkəcək.

Xatırladaq ki, bir neçə gün əvvəl ABŞ-ın vitse-prezidenti J.D.Vens Rusiya münaqişəni həll etməkdən imtina edərsə, Amerika qoşunlarının Ukraynaya göndəriləcəyini istisna etməyib. Lakin sonradan o, sözlərini təkzib edib. Pentaqon ABŞ hərbçilərinin Ukraynaya yerləşdirilməsini istisna edib.