Ukrayna Prezidenti Volodimir Zelenskinin Türkiyəyə səfəri ilə bağlı bir sıra detallar məlum olub.
Modern.az xəbər verir ki, detalları Türkiyə Prezident Administrasiyasının Kommunikasiya şöbəsinin rəhbəri Fəxrəddin Altun açıqlayıb.
Sabah baş tutacaq səfərdə Ukraynadakı vəziyyəti müzakirə edəcəklər. Onun sözlərinə görə, danışıqlar Türkiyə tərəfinin təşəbbüsü ilə baş tutacaq.
“Fevralın 18-də prezident Rəcəb Tayyib Ərdoğan özünün dəvəti ilə ölkəyə rəsmi səfərə gələcək Ukrayna prezidenti Volodimir Zelenski ilə prezident sarayında görüşəcək”, – Fahrettin Altun sosial şəbəkədə yazıb.
Bəyanatda iki liderin əməkdaşlığın və ikitərəfli əlaqələrin yaxşılaşdırılması yollarını, Ukraynada baş verən son hadisələri, regional və qlobal məsələləri müzakirə edəcəkləri bildirilir. Tərəflərin iki ölkə arasında əməkdaşlığın gücləndirilməsi üçün atılacaq addımları da müəyyən edəcəyi gözlənilir.
Zelenskinin Türkiyəyə səfəri Rusiya Federasiyası və ABŞ-ın rəsmi nümayəndə heyətləri arasında çərşənbə axşamı Səudiyyə Ərəbistanında keçirilməsi planlaşdırılan danışıqlara təsadüf edir. Rusiya prezidentinin mətbuat katibi Dmitri Peskov bildirib ki, görüş Rusiya-Amerika münasibətlərinin bərpasına, Ukrayna münaqişəsi üzrə mümkün danışıqların hazırlanmasına, Rusiya və ABŞ prezidentləri Vladimir Putin və Donald Tramp arasında görüşün təşkilinə həsr olunacaq. Rusiyanı görüşdə xarici işlər naziri Sergey Lavrov və Rusiya prezidentinin beynəlxalq məsələlər üzrə köməkçisi Yuri Uşakov təmsil edəcək. Amerika tərəfinə dövlət katibi Marko Rubio, ABŞ-ın milli təhlükəsizlik üzrə müşaviri Mayk Uolz və ABŞ prezidentinin Yaxın Şərq üzrə xüsusi nümayəndəsi Stiv Vitkoffun daxil olacağı gözlənilir.
***
17:05
Ukrayna Prezidenti Volodimir Zelenski Türkiyəyə səfər edəcək.
Modern.az xəbər verir ki, bu barədə TRT kanalı məlumat yayıb.
Səfər sabah - fevralın 18-də baş tutacaq. O, Ankarada türkiyəli həmkarı Rəcəb Tayyib Ərdoğanla görüşəcək.
Qeyd edək ki, səfər Ərdoğanın dəvəti ilə baş tutacaq. Bu, müharibənin başlamasından sonra Zelenskinin Türkiyəyə ikinci səfəridir.
Xatırladaq ki, Zelenski hazırda BƏƏ-də səfərdədir.
