Rusiya və ABŞ nümayəndə heyətləri arasında növbəti görüş keçiriləcək.
Modern.az-ın məlumatına görə, nümayəndələr sabah İstanbulda toplaşacaq.
Bildirilir ki, Ukrayna müharibəsinin başlaması ilə səfirliklərinin fəaliyyətini qarşılıqlı dayandıran ölkələr Türkiyədə bu mövzunu müzakirə edəcək.
Türkiyə bir daha sülh danışıqlarına ev sahibliyi edəcək və beynəlxalq diplomatiyanın mərkəzi kimi çıxış edəcək.
Görüşdə xüsusilə Ukrayna münaqişəsi və beynəlxalq sanksiyalarla bağlı məsələlər əsas mövzular olacaq.
Rusiyanın xarici işlər naziri Sergey Lavrov bildirib ki, diplomatlar iki ölkə arasında yaranmış sistematik problemləri müzakirə edəcək və səfirliklərin normal fəaliyyətinin bərpa olunması istiqamətində addımlar atılacaq.
Qeyd edək ki, tərəflər arasında sonuncu görüş fevralın 18-də Ər-Riyadda keçirilib. Həmin vaxt Rusiya nümayəndə heyətinin tərkibində xarici işlər naziri Sergey Lavrov və Rusiya prezidentinin köməkçisi Yuri Uşakov daxil edilib. Amerika tərəfini dövlət katibi Marko Rubio, Donald Trampın Yaxın Şərq üzrə xüsusi nümayəndəsi Stiv Vitkoff və prezidentin milli təhlükəsizlik üzrə müşaviri Mayk Uolz təmsil ediblər.
Xatıtladaq ki, Rusiya ilə Ukrayna arasında müharibə 2022-ci il fevralın 24-də başlayıb. Rəsmi Ankara savaşın ilk günlərindən etibarən tərəflər arasında vasitəçi olmağa çalışır.
2022-ci il iyulun 22-də Türkiyənin və BMT-nin vasitəçiliyi ilə tərəflər arasında “Taxıl sazişi” imzalanıb. Bu razılığın nəticəsində indiyədək dünya ölkələrinə 312 milyon taxıl daşınıb. Daha sonra danışıqlar təxirə salınıb və razılaşmanın icrası dayandırılıb.
