Fevralın 28-də ABŞ Prezidenti Donald Tramp və Ukrayna Prezidenti Volodimir Zelenski arasında Ağ Evdə keçirilən görüş gərgin müzakirələrlə yadda qalıb.
Modern.az xəbər verir ki, Qərb mediası görüşün nəticələrini fərqli aspektlərdən şərh edib.
CNN-in mənbələrinə əsasən, ABŞ-ın xüsusi nümayəndəsi əvvəlcədən Zelenskiyə Tramp ilə görüşməməyi tövsiyə edib. Keyt Kelloq Ukrayna liderinə əvvəlcə Vaşinqtonla ikitərəfli əlaqələri gücləndirməyi məsləhət görüb. Lakin Kiyev təkid edərək Zelenskinin ABŞ-a səfərini təşkil edib.
"CBS News" isə qeyd edir ki, hazırda Amerika administrasiyası müharibənin tənzimlənəcəyinə dair ümumiyyətlə ümidini itirmək üzrədir.
"Bloomberg" bildirir ki, Ukraynanın gələcək perspektivləri müharibənin ən çətin günləri qədər qaranlıq görünür. Avropa ölkələri çıxılmaz vəziyyətdədir: onlar ya Kiyevi təkbaşına dəstəkləməlidirlər, ya da siyasi mənada Zelenskiyə zərər vura biləcək bir anlaşmaya gedərək Trampın şərtlərini qəbul etməlidirlər. Ağ Evdə fikir ayrılığı yaranıb. Bəzi müşavirlər hesab edirlər ki, Bayden administrasiyası Zelenskini “pis öyrədib” və indi onun dövrü bitib. Digərləri isə düşünür ki, ABŞ Ukraynanın müdafiəsinə həddən artıq sərmayə qoyub və geri çəkilmək fikrində deyil. Bunun əvəzinə, Vaşinqtonun Kiyevə təzyiqləri artıracağı və Zelenski ilə birbaşa təmaslardan yayınacağı gözlənilir.
"The New York Times" isə bildirir ki, Ukrayna əlavə ABŞ hərbi yardımı olmadan ancaq aprelin sonu və ya may ayına qədər döyüş sursatına malikdir. Bununla belə, 2022-ci ilin vəziyyəti ilə müqayisədə, Kiyevin yaxın zamanda böyük məğlubiyyətə uğrayacağına dair dəqiq proqnoz vermək çətindir. Eyni zamanda, Avropa rəsmiləri düşünür ki, Ağ Evdə baş verən gərgin müzakirələr Trampın əsas məqsədini ortaya qoyub – Moskva ilə münasibətləri düzəltmək.
"Axios" yazır ki, 28 fevral Avropa üçün dönüş nöqtəsi olub. Qitə ölkələri Trampın NATO-ya qarşı düşmən münasibətinə tədricən alışmağa başlayır. ABŞ-da isə xüsusilə Respublikaçılar düşərgəsində Zelenskiyə qarşı sərt tənqidlər artır. Bununla belə, bəzi müşahidəçilər görüşün həm ABŞ, həm də Ukrayna üçün mənfi nəticələndiyini düşünürlər. Nəticədə yalnız Vladimir Putin qazanıb.
"The Washington Post"un yazdığına görə, bəzi diplomatlar Zelenskiyə qarşı “planlaşdırılmış hücum”un həyata keçirildiyini iddia edirlər. ABŞ senatorları Ukrayna liderinə ehtiyatlı olmağı məsləhət görmüşdülər və indi onun bu “tələyə” necə düşdüyünü anlaya bilmirlər. Onlar bildiriblər: “Sizin həyatınız bu insandan asılıdır. Əgər o, sizə tort atmağa başlasa belə, cavab verməyəcəksiniz!”
Siyasi təhlilçilər hesab edirlər ki, əgər Zelenski vəziyyəti strateji başa düşə bilirsə, o, ABŞ-da yeni, nüfuzlu bir xüsusi nümayəndə təyin etməlidir. Əks halda, Vaşinqton Ukraynanın iştirakı olmadan Moskva ilə razılığa gələ bilər.
