Xəbər verildiyi kimi, İranın strateji məsələləri üzrə vitse-prezidenti Məhəmməd Cavad Zərif istefa verib.
O, iqtisadiyyat və maliyyə naziri Əbdülnasir Hemmatinin impiçment elan edilməsindən sonra istefa vermək qərarını açıqlayıb.
Modern.az-ın məlumatına görə, Məhəmməd Cavad Zərif X sosial media hesabındakı paylaşımda vəzifəsindən istefa verdiyinə belə aydınlıq gətirib.
“Uca Allaha şükür edirəm ki, ötən 9 ayda mənə millətin iradəsini həyata keçirmək, xalqa xidmət etmək üçün əlindən gələni etmək imkanı verdi.
Son 6 ayda özüm və ailəm ən iyrənc təhqir, böhtan və təhdidlərlə üzləşmişik. Hətta hakimiyyət daxilində də 40 illik xidmətimin ən çətin və ağrılı dövrünü keçirdim. Amma ayaqda qaldım.
Mən heç vaxt bu torpağa xidmət yolunda çətinliklərdən, bəlalardan qaçan biri olmamışam və deyiləm. Bu yolda çoxlu təhqirlərə, böhtanlara dözdüm və ölkənin mənafeyinə xələl gəlməsin deyə yalanlara qarşı susmağa üstünlük verdim.
Dünən Ədliyyə sisteminin sədrinin dəvəti ilə onunla görüşdüm. Ölkədəki mövcud şəraiti nəzərə alaraq, hökumətə daha çox təzyiq göstərməmək üçün mənə universitetə qayıtmağı tövsiyə etdi. Mən bu təklifi tərəddüd etmədən qəbul etdim.
Mən həmişə yük deyil, dayaq olan biri olmaq istəmişəm. Məsuliyyət yükünü çiynimdən götürdüyünə görə cənab Prezidentə ürəkdən təşəkkür edirəm. Ümid edirəm ki, mənim kənara çəkilməyimlə xalqın tələblərinə, hakimiyyətin uğurlarına mane olan bəhanələr də aradan qalxacaq. Hörmətli Dr. Pezeşkianı dəstəkləməkdən qürur duyuram və ona və xalqa həqiqətən xidmət edən bütün digər rəsmilərə ən yaxşı arzularımı bildirirəm. Bütün çatışmazlıqlarıma görə Allahdan və sizdən, səbirli və sadiq İran xalqından üzr istəyirəm”.
