Prezident Vladimir Zelenski Ukraynanın nadir torpaq metalları üzrə ABŞ-la müqavilə bağlamağa hazır olduğunu açıqlayıb.

Modern.az-ın məlumatına görə, bu barədə “Reuters” agentliyi məlumat yayıb.

“Vladimir Zelenski bazar günü bildirib ki, o, ABŞ prezidenti Donald Trampla münasibətlərini xilas etmək mümkünlüyünə inanır... Zelenski ABŞ-la minerallar sazişini imzalamağa hələ də hazır olduğunu və ABŞ-ın da buna hazır olacağına inandığını bildirib”, - agentlik qeyd edib.

Amerika tərəfinin sözlərinə görə, saziş nadir torpaq minerallarının, neft və qazın hasilatı və nəqli, habelə Ukrayna ərazisində infrastrukturun inkişafı ilə bağlı məsələləri tənzimləyəcək. ABŞ prezidenti bəyan edib ki, sazişə əsasən, ABŞ Ukraynanın faydalı qazıntıları, nadir torpaq metalları, neft və qazın işlənməsi üzrə əsas tərəfdaş olacaq.

Layihə bunu Ukrayna və ABŞ üçün faydalı kimi xarakterizə edib.

Tramp Kiyevdən Vaşinqtonun müharibə dövründə verdiyi yardıma görə 400-500 milyard dollar təzminat zəmanəti tələb edir.

Xatırladaq ki, fevralın 28-də Vaşinqtonda Trampla Zelenski arasında mübahisəyə çevrilən görüş olub. ABŞ-Ukrayna nadir torpaq metalları müqaviləsinin imzalanması hər şey hazır olmasına baxmayaraq ləğv edilib və Zelenski Ağ Evi tərk etmək məcburiyyətində qalıb. Tramp bəyan edib ki, Zelenskinin Rusiya ilə münaqişəni həll etmək istəyini görmür.