Bir müddət əvvəl PKK terror təşkilatının Türkiyədə həbsdə olan qurucusu və lideri Abdullah Öcalan tərəfdarlarını silahı yerə qoyması üçün müraciət edib.
Təşkilatla əlaqəli olan bir çox qruplaşma çağırışa müsbət reaksiya verib. Ancaq hələlik terrorçuların Avropa qanadından çağırışa cavab verilməyib.
Mövzu ilə bağlı Modern.az-a danışan türkiyəli hərbi ekspert, general Yücel Karauz bildirib ki, Türkiyə terrorçularla danışıqlar masasına əyləşib atəşkəs imzlamaz:
"Türkiyənin məqsədi "terorsuz Türkiyə, terrorsuz bölgədir". Türkiyə terorçularla müzakirələr aparmaz, atəşkəs imzalamaz. Hadisəni bu cür analiz etmək istəyənlər bu prosesi baltalayandır. "Terrorsuz Türkiyə, terrorsuz bölgə" hədəfinə çatmaq üçün Türkiyənin qarşısında birdən çox cəbhə var. Terror qruplaşmasının İraq, Suriya, İran və Avropada qanadları var. Avropa qanadı terror qruplaşmasını bəsləyən, onun maddi bazasını illeqal yollarla - narkotik qaçaqmalçılığı və digər ticarət vasitələri ilə təşkil edən, silahlarını yollayan strukturdur. Terrorsuz Türkiyə hədəfinə nail olmaq üçün Avropada şantajla pul toplayan və PKK-nı silahla təchiz edən Avropa qanadının aradan qaldırılması vacibdir. Bunlar getdikləri ölkələrdə asanlıqla vətəndaşlıq ala bildiklərinə və Türkiyə ilə bağlılıqları azaldığından xarici təsirləri tez qəbul edirlər. Buna görə də proses heç də asan deyil".
Y.Karauz vurğulayıb ki, Suriyada Azad Suriya Ordusunun içərisində əriməyən demoqrafik və kommunikasiya formalarına zidd şəkildə fəaliyyət aparan təşkilatın da silahı yerə qoyub özünü buraxmağına ehtiyac var:
"YPG içərisindəki PKK-lılar silahı yerə qoyub, Suriyanın yeni rejiminin ordusuna daxil olmalıdır. Bunlar baş vermədikdə nə Türkiyəyə, nə Diyarbəkirə, nə Dəməşqə, nə Bağdada, nə də Avropanın müxtəlif şəhərlərinə sülhün, xoşbəxtliyin gəlməsi mümkün deyil. Türkiyə dövləti bu baxımdan təşəbbüs götürüb. Türkiyə dövləti xaricindəki, Suriya,İraq, İran və digər ölkələrdəki qrupların davranışları prosesin kəsilmədən davam edib-etməyəcəyini, terrorsuz bölgənin yaranıb-yaramayacağı baxımından önəmlidir".
