Suriyada ələvilərin (Bəşər Əsəd tərəfdarları) ölkənin yeni hökumətinə qarşı kütləvi üsyanı baş verib.

Modern.az xəbər verir ki, kütləvi informasiya vasitələrinin məlumatına görə, Latakiyada və regionun digər mühüm nöqtələrində ələvilərlə toqquşmalar baş verib.

“Latakiyada hökumət qüvvələri ilə Bəşər Əsəd hökumətinin dayağı olan Ələvi qüvvələri arasında şiddətli toqquşmalar gedir. Əsədin ailəsinin mənşəyi olduğu Cəbla bölgəsində azı 13 hökumət əsgəri öldürülüb", - Reuters xəbər yayıb.

Məlumata görə, ələvilərin üsyanı yeni hökumətin əsgərlərinin Latakiyadakı kəndlərdən birində təmizləmə əməliyyatı keçirməyə cəhd etdikdən sonra başlayıb.

Ələvi üsyançıları hücumları dəf edib və yeni hökumətin ordusunu tutduqları şəhərlərdən qovub, xeyli əsgər öldürüblər.
Yeni hökumət bölgəyə nəzarəti bərpa etmək üçün artıq Hələb, Həma və Dəməşqdən əlavə qüvvələr göndərib.

“Əl-Ərəbiyyə” xəbər verir ki, Suriya təhlükəsizlik qüvvələri Cəblaya əlavə qüvvələr göndərib, şəhərin bir neçə bölgəsində qarşıdurmalar davam edir.

Suriya təhlükəsizlik qüvvələri cümə günü Latakiya və Tartusda keçmiş rejimin qalıqlarını təmizləmək üçün genişmiqyaslı əməliyyatlara başladığını bildirib.

Suriya qoşunları Tartus və Latakiya əyalətlərinin mərkəzinə nəzarəti ələ keçirib.

Cəblanın bir sıra ərazilərində qarşıdurmalar hələ də davam edir.

Suriyada Əsəd tərəfdarlarına qarşı hazırkı təhlükəsizlik əməliyyatı ən böyük əməliyyatdır.

Suriyanın yeni hökuməti 2024-cü ilin dekabrında silahlı müxalifətin genişmiqyaslı hücumundan sonra hakimiyyətə gəlib. Nəticədə prezident Bəşər Əsəd istefa verib və ölkəni tərk edərək Rusiyaya sığınıb.