Pakistanın cənub-qərbində yerləşən Bəlucistan əyalətində silahlılar qatara hücum edib.
Modern.az bu barədə AFP agentliyinə istinadən xəbər verir.
Bildirilir ki, qatardakı 450-yə yaxın sərnişin girov götürülüb. Hücum zamanı sürücü yaralanıb. Hücuma görə məsuliyyəti separatçı Bəlucistan Azadlıq Ordusu qruplaşması öz üzərinə götürüb.
Qrup dəmiryol relslərini partladıb və "Sibinin ucqar bölgəsində (Bəlucistan şəhəri) qatara nəzarət edir". Adı açıqlanmayan polis zabiti AFP-yə bildirib ki, qatar “dağlarla əhatə olunmuş tunelin qarşısında” ilişib. Yaxınlıqdakı xəstəxanalarda fövqəladə vəziyyət elan edilib.
Qeyd edək ki, Bəlucistan Pakistanın ən böyük və ən yoxsul əyalətlərindən biridir. Bir neçə onilliklərdir ki, Bəlucların separatçı qrupları (Pakistanda təxminən 7 milyon bəluc yaşayır) əyalətdə fəallıq göstərirlər. Bəlucistan Azadlıq Ordusu 1970-ci illərin əvvəllərində yaradılıb. Üzvləri tərəfindən həyata keçirilən hücumlara görə Pakistan, ABŞ, Böyük Britaniya, Avropa Birliyi və Çində terror təşkilatı kimi tanınıb.
