Rusiya Prezidenti Vladimir Putin ABŞ prezidenti Donald Trampla söhbətində atəşkəs üçün əsas şərtləri açıqlayıb.
Modern.az xəbər verir ki, bu barədə Kremlin mətbuat xidməti məlumat yayıb.
O bildirib ki, 30 günlük atəşkəs tətbiq etmək üçün Ukraynaya xarici hərbi yardımı və kəşfiyyat məlumatlarının verilməsini tamamilə dayandırmaq lazımdır. Gələcək atəşkəs üçün həmçinin bütün döyüş təmas xətti boyunca atəşkəs üzərində effektiv nəzarəti təmin etmək lazımdır.
“Dəfələrlə sabotaj edən və əldə olunmuş razılaşmaları pozan Kiyev rejiminin danışıqlar apara bilməməsi ilə bağlı ciddi risklər də qeyd olunub”, - Kremldən bildiriblər.
Putin vurğulayıb ki, Ukraynada məcburi səfərbərliyi və Ukrayna Silahlı Qüvvələrinin yenidən silahlandırılmasını dayandırmaq lazımdır. Donald Trampın Kursk vilayətindəki ukraynalı hərbçilərlə bağlı müraciətini nəzərə alaraq, “Rusiya tərəfi humanitar xarakterli mülahizələri rəhbər tutmağa hazırdır və onların təslim olduğu halda Rusiya qanunlarına və beynəlxalq hüquq normalarına uyğun olaraq Ukrayna Silahlı Qüvvələrinin əsgərlərinin həyatına və onlara layiqli rəftarına zəmanət verir”.
