Rusiya-Amerika danışıqları başa çatdıqdan sonra Ər-Riyadda Ukrayna və ABŞ rəsmiləri görüş keçirəcək.

Modern.az xəbər verir ki, bu barədə “Reuters” Ukrayna hökumətindəki yüksək vəzifəli mənbəyə istinadən məlumat yayıb.

“ABŞ və Ukrayna rəsmiləri bazar ertəsi Səudiyyə Ərəbistanında Rusiya-Amerika danışıqları başa çatdıqdan sonra danışıqların növbəti raundunu keçirəcək”, - agentliyin açıqlamasında bildirilir.

Qeyd edək ki, ötən gün - martın 23-də ABŞ və Ukraynanın nümayəndə heyətləri enerji obyektlərinin və mühüm infrastrukturun mühafizəsi məsələsini müzakirə etmək üçün artıq Ər-Riyadda görüşüblər. Müdafiə naziri Rustem Umerov görüşün “konstruktiv və mənalı” adlandırıb. 

Rusiya ilə ABŞ arasında danışıqlar isə bu gün, martın 24-də səhər saatlarında başlayıb. Rusiya nümayəndə heyətinə Federasiya Şurasının Beynəlxalq Əlaqələr Komitəsinin sədri Qriqori Karasin və FTX direktorunun müşaviri Sergey Beseda rəhbərlik edir. Reuters agentliyinin məlumatına görə, Amerika tərəfini ABŞ Milli Təhlükəsizlik Şurasının Avropa və Rusiya məsələləri üzrə keçmiş baş direktoru Endryu Pik və ABŞ Dövlət Departamentinin yüksək vəzifəli əməkdaşı Maykl Anton təmsil edir.