ABŞ-də məxfi informasiya sızması ilə bağlı qalmaqal yaşanır.
Modern.az xəbər verir ki, "The Atlantic" jurnalının baş redaktoru Ceffri Qoldberqin bildirdiyinə görə, ABŞ-nun milli təhlükəsizlik müşaviri Maykl Uolts onu səhvən "Signal" messencerində məxfi söhbətə əlavə edib.
Həmin çatda Yəməndəki husilərə qarşı planlaşdırılan hərbi əməliyyat müzakirə olunub.
Mənbələrə görə, bu qrupda ABŞ-ın vitse-prezidenti Cey Di Vens, dövlət katibi Marko Rubio, müdafiə naziri Pit Hegset və Milli Təhlükəsizlik Şurasının digər üzvləri olub.
Müzakirələrində əməliyyatın vaxtı, məqsədləri və mümkün reaksiyalar nəzərdən keçirilib.
Qoldberqin sözlərinə görə, vitse-prezident Cey Di Vens prezident Donald Trampın dərhal hərbi zərbə endirilməsi qərarı ilə razılaşmayıb. O, hücumların daha gec həyata keçirilməsini təklif etsə də, digər rəsmilər onu bu fikirdən daşındırıblar.
"Mən indiyə qədər belə bir məxfi məlumat pozuntusunun şahidi olmamışdım. Milli Təhlükəsizlik Şurasının əməkdaşları "Signal"dan əsasən görüşlərin təşkili və loqistika məsələləri üçün istifadə edirlər. Heç vaxt məxfi hərbi əməliyyatları müzakirə etmək üçün deyil", - Qoldberq deyib.
Əməliyyat başladıqdan sonra Qoldberq Milli Təhlükəsizlik Şurasına rəsmi şərh üçün müraciət edib. Şura nümayəndəsi çatı təsdiqləyərək, jurnalistin ona necə qoşulduğunun araşdırıldığını bildirib.
Hadisə ilə bağlı açıqlama verən müdafiə naziri Pit Hegset deyib ki, heç kim müharibə planlarını mətn mesajları ilə göndərməyib: "Mən bu barədə yalnız bunu deyə bilərəm."
CNN-in iki mənbəsinə görə, Donald Tramp "The Atlantic"in dərc edəcəyi materialdan əvvəlcədən xəbər tutub və məsələ ilə bağlı keçirilən brifinqdə Ceffri Qoldberqə qarşı açıq narazılıq ifadə edib.
Bu sızmanın ABŞ hökuməti və ordu rəhbərliyi üçün hansı nəticələr doğuracağı hələlik bəlli deyil. Lakin belə bir hadisənin baş verməsi ölkənin milli təhlükəsizliyinə ciddi zərbə vurduğu şübhəsizdir.
ABŞ qanunlarına görə, məxfi informasiyanın düzgün idarə olunmaması və ya sui-istifadəsi cinayət hesab edilə bilər. "The Atlantic" jurnalının məlumatına əsasən, Maykl Uoltsun Signal tətbiqindəki mesajları müəyyən müddətdən sonra avtomatik siləcək şəkildə tənzimləməsi federal arxiv qanunlarının pozulması ehtimalını gündəmə gətirir.
Tramp administrasiyası jurnalistlərə sızdırılan məlumatları araşdırmaq üçün yeni tədbirlər planlaşdırır.
Hadisə ilə bağlı Demokrat Partiyasından olan qanunvericilər "Signal" qrupunun istifadəsinin qanunsuz olduğunu bildirərək, rəsmi araşdırma tələb ediblər. Senatın Demokratik lideri Çak Şumer bu hadisəni “son dərəcə ciddi hərbi kəşfiyyat pozuntusu” adlandırıb və Senatın Respublikaçı lideri Con Tun ilə məsələni araşdırmaq üçün plan qurduqlarını bildirib:
"Biz hələ təfərrüatları öyrənirik. Amma açıq-aşkar bu məsələni araşdırmalıyıq. Bu işin kökünə enəcəyik və nələrin baş verdiyini müəyyən edəcəyik."
Ağ Ev hadisəyə reaksiyasında bildirib ki, bu sızma prezident Trampın milli təhlükəsizlik komandasına etimadını sarsıtmır. Ağ Evin mətbuat katibi Karolin Levitt Reuters agentliyinə açıqlamasında qeyd edib:
"Prezident Tramp, o cümlədən milli təhlükəsizlik müşaviri Maykl Uolts olmaqla, milli təhlükəsizlik komandası ilə bağlı tam inama malikdir."
