Rusiya Prezidenti Vladimir Putin Ukraynada yeni seçkilərin keçirilməsi və münaqişənin həlli üçün müvəqqəti hakimiyyətin qurulmasını təklif edib.

Modern.az-ın məlumatına görə, Putin bu təklifi Murmansk limanına səfəri zamanı səsləndirib.

Putinin fikrincə, Ukraynada legitim rəhbərliyin olmaması bu ölkə ilə danışıqları çətinləşdirir. O, müvəqqəti administrasiyanın BMT, ABŞ, Avropa ölkələri və digər tərəfdaşların nəzarəti altında qurula biləcəyini qeyd edib.

O, ABŞ Prezidenti Donald Trampın Ukrayna münaqişəsini həll etmək istədiyinə inandığını bildirib.

Ağ Ev rəsmiləri Putinin təklifinə cavab olaraq bildiriblər ki, Ukraynada idarəetmə bu ölkənin konstitusiyasına və xalqın iradəsinə əsaslanır. Avropa liderləri də Paris görüşündə Ukrayna ordusunu gücləndirmək üçün dəstəklərini ifadə ediblər.

Ukrayna Prezidenti Volodimir Zelenski də Putinin iddialarını rədd edib. O, hərbi vəziyyət səbəbindən ölkədə seçkilərin keçirilməsinin qanunla qadağan edildiyini xatırladıb.

Putin çıxışı zamanı Rusiyanın Ukraynadakı hərbi əməliyyatlarında irəlilədiyini və məqsədlərinə doğru addımladığını vurğulayıb. O, Moskvanın sülh yolu ilə həllə üstünlük verdiyini, lakin bunun Rusiyanın maraqları hesabına baş verməməli olduğunu bildirib.

Hazırda Rusiya Ukraynanın 20%-ni nəzarətə götürüb və dörd bölgəni rəsmi şəkildə ilhaq edib. Bundan başqa, avqust ayında Ukrayna qüvvələrinin Rusiya ərazisinə keçidindən sonra Moskva bəzi itirdiyi əraziləri geri qaytardığını bildirir.

Putin çıxışında BRICS ölkələrinin Ukrayna münaqişəsinin həllinə töhfə verməyə çalışdığını qeyd edib. Xüsusilə Çin və Hindistanın bu prosesdə rolunu vurğulayıb.

Putin Avropa ilə əməkdaşlığa hazır olduqlarını desə də, Qərb ölkələrinin siyasətini qeyri-müəyyən və etibarsız adlandırıb. O, Rusiyanın "Qərbin vədlərinə artıq inanmadığını" bildirib.