Ermənistanda müxalifətdə qarşı əməliyyat başladılıb. "Ana Ermənistan" müxalifət blokunun 12 tərəfdarı saxlanılıb. Ermənistan Daxili İşlər Nazirliyinin Kriminal Polisi və Milli Təhlükəsizlik Xidmətinin məlumatlarına görə, Korrupsiyaya Qarşı Mübarizə Komitəsi seçki rüşvətinin verilməsi və alınması, habelə seçki zamanı xeyriyyəçiliklə bağlı qadağanın pozulması faktları üzrə cinayət işləri başlanılıb.

Eyni zamanda iki deputatın-Ovik Ağazaryan və "Mənim şərəfim var" müxalifət fraksiyasından olan deputat Taron Markaryanın toxunulmazlıığı ləğv edilib. Ermənistan parlamentinin deputatları öz həmkarları barədə cinayət işinə başlanılması ilə əlaqədar səs veriblər.  

Modern.az-a açıqlamasında politoloq Elxan Şahinoğlu bildirib ki, Nikol Paşinyanın parlamentdəki son çıxışı radikal müxalifətə qarşı ciddi tədbirlərin görüləcəyinə işarə ola bilər:

"Paşinyan keçmiş 3 prezident – Levon Ter-Petrosyan, Robert Köçəryan və Serj Sarkisyanı hədələyərək, “mənim əsəblərimlə oynamayın, Sizi divara çırparam” kimi ifadələr işlətdi. Paşinyanı əsəbiləşdirən o olub ki, keçmiş prezidentlər İkinci Qarabağ müharibəsində məğlubiyyətə görə baş naziri ittiham edirlər. Halbuki, Azərbaycan torpaqlarının işğalında və bununla qonşu dövlətlərlə düşmənçilik toxumunun səpilməsində Paşinyandan əvvəl məhz həmin prezidentlər rol oynayıblar. Ermənistanın gələcək müharibədə məğlub olacağı elə həmin dövrdən bəlliydi. Çünki, Azərbaycan heç zaman işğalla barışmayacaq və ordusunu gücləndirdikdən sonra torpaqlarını azad edəcəkdi.

Paşinyanın martın 26-da parlamentdə çıxışı zamanı “Qarabağ hərəkatı erməni dövlətçiliyinin formalaşmasına mane olur” ifadəsi də müxaifətə işarədir. Baş nazir bu açıqlamanı verərkən ölkəsinin üzləşə biləcəyi təhlükəyə işarə edib. “Qarabağ hərəkatı davam etməməlidir” deyən Paşinyan parlamentdəki müxalifət təmsilçilərindən fərqli olaraq anlayır ki, bu “hərəkatın” davamı Azərbaycanla sülhə əsas əngəllərdən biridir".

Politoloq vurğulayıb ki, sülh sazişi ilə “Qarabağ hərəkatı” bir araya sığmır:

"Ermənistanla Azərbaycan arasında sülh sazişi imzalandıqdan sonra qonşu ölkədə “Qarabağ hərəkatı” fəaliyyətini davam etdirərsə, bu həmin sənədin əhəmiyyətsiz olacağına dəlalət edəcək. Belə çıxacaq ki, Ermənistan bir tərəfdən Azərbaycanın ərazi bütövlüyünü tanıyacaq, digər tərəfdən qonşu dövlətdə ölkəmizin ərazisinə iddia edən “hərəkat” fəaliyyətini davam etdirəcək. Bu qarşıdurmanın davamı demək olacaq. Bunu anlayan və Azərbaycanla yeni müharibədən qorxan Paşinyan müxalifətin müavimətinə baxmayaraq “Qarabağ hərəkatının” fəaliyyətini qadağan etməlidir".