ABŞ Müdafiə naziri Pit Heqssetin həyat yoldaşı Cennifer Heqsset yüksək səviyyəli hərbi görüşlərdə iştirak edib.

Modern.az xəbər verir ki, bu barədə "The Wall Street Journal" qəzeti yazıb.

O, Brüsseldə NATO-nun qərargahında Böyük Britaniyanın müdafiə naziri Con Hili ilə keçirilən məxfi görüşlərə qatılıb.

ABŞ rəsmiləri Cennifer Heqssetin Pentaqon əməkdaşı olmadığını təsdiqləsələr də, onun gizli müzakirələrdə iştirakı mübahisələrə səbəb olub.

Məlumata görə, bu görüşlərdə Ukraynaya hərbi yardım və ABŞ-ın kəşfiyyat məlumatlarını paylaşmaqdan imtina etməsi kimi həssas məsələlər müzakirə olunub.

NATO çərçivəsində keçirilən forumda 50-dən çox ölkə iştirak edib və burada Ukraynaya gizli şəkildə göndərilən yardımlar müzakirə edilib.

Görüşdə iştirak edən bəzi rəsmilər Cennifer Heqssetin kim olduğunu bilmədiklərini, digərləri isə onun iştirakına təəccübləndiklərini bildiriblər. ABŞ mediası bu hadisənin Vaşinqtonda ciddi suallar doğurduğunu yazır. Analitiklər bu hadisənin ABŞ-ın milli təhlükəsizlik qaydalarına uyğun olub-olmadığını araşdırırlar.