Bu gün Beynəlxalq Sıfır Tullantı Günüdür. Beynəlxalq Sıfır Tullantı Günü qlobal miqyasda tullantıların idarə edilməsinin gücləndirilməsinin vacibliyini və tullantıların çirklənməsi böhranını həll etmək üçün davamlı istehlak və istehsal modellərinin təşviq edilməsinin vacibliyini vurğulayır.

 

Modern.az xəbər verir ki, dünyada hər il 2,1 milyard ilə 2,3 milyard ton arasında bərk məişət tullantıları istehsal olunur.  Müvafiq tədbirlərin görülməyəcəyi təqdirdə 2050-ci ilə qədər illik tullantı istehsalının 3,8 milyard tona çatacağı gözlənilir.

 

Tullantıların çirklənməsi insan sağlamlığını təhdid edir, qlobal iqtisadiyyata hər il yüz milyardlarla dollar ziyan vurur və üçlü planet böhranını daha da pisləşdirir: iqlim dəyişikliyi böhranı, təbiətin, torpaq və biomüxtəlifliyin itməsi böhranı, çirklənmə və tullantı böhranına səbəb olur.

 

Statistikaya görə, son 10 ildə dünyada ən çox tullantı istehsal edən ölkə Amerika Birləşmiş Ştatlarıdır. Belə ki, 2018-ci ildə ABŞ-də 265.2 milyon ton məişət tullantısı istehsal edib. Onu 2021-ci ildə 49.7 milyon ton tullantı istehsal edən Almaniya izləyir. Üçüncü sırada isə 2021-ci ildə 40.95 milyon ton tullantı ilə Yaponiya gəlir. Siyahıda daha sonra Fransa, Türkiyə, Böyük Britaniya, İtaliya, Cənubi Koreya, İspaniya, Avstraliya və Polşa kimi dövlətlər yer alır.