Erməni separatçıların Rusiyadakı "nümayəndəliyinin" fəaliyyəti dayandırılıb. Separatçılar bu "nümayəndəlik"dən ləğv edilən qondarma rejimin təbliğatını aparmaq beynəlxalq ictimaiyyətdə legitimlik qazanmaq üçün istifadə edirdi.
Modern.az-ın məlumatına görə, separatçıların "nümayəndəlik"ləri yalnız Rusiyada deyil, digər ölkələrdə də mövcud olub.
Onlardan bəziləri hələ də fəaliyyətlərini davam etdirirlər. Bu "nümayəndəliklərin" açılış tarixləri və fəaliyyətləri barədə dəqiq məlumatlar məhduddur. Lakin məlumdur ki, onların əksəriyyəti son 20 il ərzində fəaliyyətə başlayıb.
"Nümayəndəlik"lərdən biri Ermənistanın paytaxtı İrəvanda yerləşir. Separatçı rejimin məhv edilməsindən sonra İrəvandakı "nümayəndəliyin" ləğvi məsələsi gündəmə gəlsə də, Ermənistan onu ləğv etmədi. Avropada da bu "nümayəndəlik"lərin fəaliyyəti davam edir. Berlin və Parisdə separatçıların ofisləri var, onların nə işlə məşğul olduqları məlum deyil.
Avstraliyanın Sidney şəhərində də separatçıların ofisi var. Kanada, ABŞ və Livanda da separatçıların "nümayəndəlik"ləri fəaliyyət göstərir.
Qeyd edək ki, Vətən müharibəsindən sonra separatçıların Rusiyadakı, eləcə də digər ölkələrdəki "nümayəndəliyinin" bağlanması barədə məlumatlar yayılmışdı. Lakin sonradan bu məlumat təkzib edilib. Bir neçə gün əvvəl isə Rusiyadakı ofisin bağlanıldığı bildirilib.
Bu cür qeyri-qanuni qurumların fəaliyyətini beynəlxalq hüququn prinsiplərinə ziddir. Ermənistan hakimiyyəti, həmçinin həmin ölkələrin rəsmi qurumları bu "nümayəndəliklərin" fəaliyyətinin dayandırmalıdır. Bu tələb regionda sülhün və sabitliyin təmin olunması, eləcə də beynəlxalq hüququn aliliyinin qorunması məqsədini daşıyır.
"Nümayəndəliklərin" fəaliyyətinin dayandırılması sülh sazişini imzalamağa hazır olan Ermənistandan başlamalıdır. Rəsmi İrəvan sülhdə səmimi olduğunu göstərmək istəyirsə, ilk növbədə bu ofisi ləğv etməli, daha sonra digər şərtləri yerinə yetirməlidir.
Modern Təhlil və Araşdırma Qrupu
