Son günlərdə "Ay Yola" başqırd qrupunun "Homay" mahnısı sosial şəbəkələrdə sürətlə populyarlıq qazanıb.

Modern.az-ın məlumatına görə, musiqi müxtəlif türk xalqları arasında böyük marağa səbəb olub.

Mahnının populyarlığı onun dərin mənası və qədim türk mifologiyasına dayanan mövzusu ilə izah edilir. Musiqi yutubda qısa müddətdə 3 milyondan çox baxış qazanıb.

"Homay" mahnısı qədim başqırd dastanı "Ural-Batır"da təsvir olunan mifik quş-qadın obrazı Homaydan bəhs edir. Dastanda Homay Samrau adlı yuxarı dünyanın kralının qızı olaraq təqdim edilir və qəhrəman Ural-Batırın həyat yoldaşıdır. O, Ural-Batırın mübarizələrində mühüm rol oynayır və ona dəstək olur.

Homay obrazı qədim türklərin inanclarında ev, ana, ailə və uşağın simvolu olan Umay (və ya Humay) ilahəsi ilə əlaqələndirilir. Umay türk mifologiyasında doğum və uşaqların hamisi sayılan ilahədir. O, hamilə qadınları və uşaqları qoruyur, bərəkət və rifah gətirir.

Mahnının sözlərində Homayın mənşəyi və xüsusiyyətləri vurğulanır. Tərcümədə deyilir ki, Homayın anası Günəşdir və onu canlı suyu olan bulaqda çimizdirib, atası Samrau isə ona xeyirxahlığı öyrədib. Bu təsvirlər Homayın ilahi və müdrik bir varlıq olduğunu göstərir.

"Homay" mahnısı türk xalqlarının ortaq mədəni və mifoloji dəyərlərini vurğulayır, onların birliyini və ortaq köklərini xatırladır. Mahnıda Homayın sədaqəti, ənənələrə bağlılığı və ailəyə verdiyi dəyər ön plana çəkilir. Bu xüsusiyyətlər türk xalqlarının mədəniyyətində mühüm yer tutur və mahnının bu qədər sevilməsinin əsas səbəblərindən biridir.

Bundan əlavə, mahnıda bəhs edilən Akbuzat adlı qanadlı at və almaz qılınc kimi simvollar da türk mifologiyasında mühüm yer tutur. Akbuzat "Ural-Batır" dastanında Ural-Batırın minərək qəhrəmanlıq göstərdiyi qanadlı atdır və güc, sürət və azadlığın simvoludur.