Almaniya Prezidenti Frank-Valter Ştaynmayer Azərbaycana səfər edəcək. O, bu gün Ermənistanda səfərdədir.

Modern.az-ın məlumatına görə, Ştaynmayerin səfəri öncəsi Almaniyadan Azərbaycana qarşı təxribatlar edilib.

Almaniya dövlət mediası "Deutsche Welle" Qarabağla bağlı erməni narrativlərini təkrarlayan bir sənədli film yayımlayıb. Eyni zamanda, Almaniya Prezidentinin rəsmi səhifəsində erməni separatçıların bayrağı əks olunub.

Politoloq Fərhad Məmmədov bu addımları Azərbaycan üçün açıq təxribat kimi dəyərləndirir.

O qeyd edir ki, Azərbaycan Qarabağla bağlı beynəlxalq müdaxilə cəhdlərinin qarşısını alıb və öz prinsipial mövqeyini qoruyur. Politoloq ATƏT-in Minsk Qrupunun buraxılmasını və Ermənistan Konstitusiyasının dəyişdirilməsini Azərbaycanın danışıqlardakı əsas tələbləri olduğunu vurğulayıb.

“Bütün bu təxribatlar bir daha sübut edir ki, Azərbaycanın Qarabağ mövzusunu birdəfəlik bağlamaq istiqamətindəki mövqeyi doğrudur”, – deyə o vurğulayıb.

Almaniyanın bu mövqeyi fonunda, Bakının Ştaynmayerin səfərinə adekvat cavab verəcəyi gözlənilir. Politoloq qeyd edir ki, “texniki səhv” bəhanəsi ilə bu təxribatların üzərindən keçmək mümkün olmayacaq. Əgər bu doğrudan da səhvdirsə, məsul şəxslər cəzalandırılmalıdır. Əks halda, bu səfər Azərbaycan-Almaniya münasibətlərinə mənfi təsir göstərə bilər.

“Bu separatizmi dəstəkləyən ideologiya Almaniya siyasətçilərinin beyinlərindən silinməlidir!”, – deyə o bildirib.