Nüfuzlu “Forbes” jurnalı dünyanın ən varlı adamlarının reytinqini hazırlayıb.
Modern.az xəbər verir ki, nəşr 2025-ci ilin varlıları siyahısına 3028 milyarderin adını daxil edib ki, bu da 2024-cü illə müqayisədə 247 nəfər çoxdur.
Dünya zənginlərinin ümumi sərvəti 2024-cü ildəkindən təxminən 2 trilyon dollar artaraq 16,1 trilyon dollara çatıb.
ABŞ-da rekord sayda - 902 milyarder var. İkinci yerdə Çin milyarderləri (516 nəfər), üçüncü yerdə Hindistan milyarderləri (205) gəlir.
“Forbes” jurnalı 9 erməni əsilli sahibkarı da dünyanın ən varlı adamları siyahısına daxil edib.
Ermənilər arasında ən yüksək yeri (717-ci yer) iş adamı Albert Avdolyan tutur. “Yota” şirkətinin təsisçisinin sərvəti bir il ərzində 2,1 milyard dollar artaraq 5 milyard dollar təşkil edib. Avdolyan Uzaq Şərq və Sibir kömür hasilatı və qaz şirkətlərinin sahibidir və o, investisiya kapitalını Rusiyanın “Megafon” və “Yota” operatorlarının səhmlərinin satışından əldə edib.
Argentina əsilli erməni sahibkar və Ermənistanın Milli Qəhrəmanı Eduardo Eurnekiyan 3,4 milyard dollar sərvəti ilə siyahıda 1072-ci yerdədir. Eurnekiyan əvvəlcə tekstil sənayesində çalışıb, sonra 1980-ci illərdə kabel televiziyasına keçib və 1990-cı illərdə Argentinanın Cablevision televiziya şirkətinin satışından 750 milyon dollar qazanıb. Eurnekiyan “Corporacion America” ilə birlikdə dünya üzrə 1,5 milyard dollardan çox gəliri olan 50-dən çox hava limanının sahibidir. Onun aktivlərinə Argentinadakı neft və qaz hasilatı obyektləri, yataqlar və boru kəmərləri daxildir.
Ermənilər arasında üçüncü yerdə “Taşir” şirkətlər qrupunun təsisçisi və prezidenti, reytinqdə 1141-ci yeri tutan Samvel Karapetyan gəlir. Mənfi qlobal vəziyyətə baxmayaraq, Karapetyanın sərvəti 300 milyon dollar artaraq 3,2 milyard dollara çatıb.
Sergey Qalitski (evlənməzdən əvvəl soyadı - Arutyunyan) reytinqdə 1141-ci yeri tutub. “Magnit” pərakəndə satış şəbəkəsinin təsisçisi və “Krasnodar” futbol klubunun prezidentinin sərvəti 3,2 milyard dollar qiymətləndirilir ki, bu da 2023-cü illə müqayisədə 100 milyon dollar azdır.
Qalitski “Mayak” radiostansiyasına müsahibəsində erməni köklərindən danışıb. “Mən 75% etnik rus, 25% erməniyəm. Rus mühitində böyüdüyüm üçün, təəssüf ki, erməni dilini bilmirəm, amma buna baxmayaraq, mən erməni köklərimlə fəxr edirəm”, - deyib.
Sahibkar Andrey Ohacanyants 2,1 milyard dollar sərvəti ilə reytinqdə 1688-ci yeri tutub. O, 2004-cü ildə onlayn tanışlıq üçün 5 vebsayt və proqram yaratmışdı: Mamba, Badoo, Bumble, Chappy və Lumen. Onun ən uğurlu layihəsi ABŞ-da yaradılmış Bumble idi. Andrey Ohacanyants 2019-cu ilin noyabrında Bumble və Badoo-dakı nəzarət səhmlərini 3 milyard dollarlıq müqavilə ilə Blackstone Group-a satıb.
Erməni əsilli iş qadını Kim Kardaşyan 1851-ci yerdən 2019-cu yerə düşüb, onun sərvəti isə dəyişməyərək 1,7 milyard dollar olub. Kardaşyan "Keeping Up with the Kardashians" realiti-şousunun yayımlanmasından sonra şöhrət qazanıb və onu 10 rəqəmli sərvətə çevirməyi bacarıb. 2023-cü ilin iyun ayında Kardaşyan Amerikanın ən varlı 100 qadını siyahısına daxil edilib.
Rusiyanın “Fix Price” pərakəndə satış şirkətinin həmtəsisçisi Artem Xaçatryan reytinqdə 2110-cu yeri tutub. Onun sərvəti 1,6 milyard dollar olaraq qiymətləndirilir. “Fix Price”a Rusiya, Qazaxıstan, Gürcüstan, Belarus, Latviya, Qırğızıstan və Özbəkistanda 4000-dən çox mağaza daxildir.
Kanadalı iş adamı və biotexnologiyalar şirkətinin həmtəsisçisi Noubar Afeyanın sərvəti ötən illə müqayisədə 200 milyon dollar azalaraq 1,2 milyard dollar təşkil edib və o, 2623-cü yerdə qərarlaşıb. O, Kembricdə, Massaçusetsdə yerləşən həyat elmləri innovasiyaları şirkəti olan Flagship Pioneering-in qurucusu və baş direktorudur. O, ABŞ-da 10-dan çox biotexnoloji şirkətin səhmlərinə sahibdir. Afeyan koronavirus peyvəndi istehsalı sayəsində milyarder olub.
2623-cü yeri Afeyanla yanaşı, hazırda Azərbaycanda həbsdə olan qondarma “artsaxın keçmiş dövlət naziri” Ruben Vardanyan da tutur. “Forbes”in məlumatına görə, onun sərvəti 1,2 milyard dollar qiymətləndirilir ki, bu da 2024-cü il məlumatından 100 milyon dollar çoxdur.
“Forbes”in məlumatına görə, 2022-ci ilin noyabrında Vardanyan biznes aktivlərini ailə etimadına köçürüb. Vardanyan qlobal “Forbes” reytinqində Ermənistanın yeganə milyarder sakini olub. Buna səbəb onun 2021-ci ildə Ermənistan pasportu alması, 2022-ci ildə isə Rusiya pasportundan imtina etməsidir. Daha əvvəlllər Amerika nəşri Vardanyanı rusiyalı milyarderlər sırasına daxil edirdi.
A.Qorxmaz
