Türkiyənin Ticarət Naziri Ömər Bolat müxalifətin ticarətə qarşı boykot çağırışlarını sərt şəkildə tənqid edib.
Modern.az xəbər verir ki, nazir bu barədə TRT-yə danışıb.
O, bu çağırışların milli iqtisadiyyata zərər vurmaq məqsədi güddüyünü bildirib və xalqı alış-veriş edərək iqtisadiyyata dəstək olmağa çağırıb.
Bolatın sözlərinə görə, hökumət 22 ildə ölkə iqtisadiyyatını 6,5 dəfə böyüdüb, ümummilli gəliri və ixracatı artırıb. "Lakin müxalifət, rüşvət və korrupsiya ittihamları gündəmi zəbt etdikdən sonra diqqəti yayındırmaq üçün bu boykot kampaniyasını təşkil edib", - nazir deyib. O, bu hərəkətlərin milli markalara və sahibkarlara zərər verdiyini vurğulayıb.
Nazir bildirib ki, İstanbulun müəyyən bölgələrində bəzi dükanlar bağlansa da, bu yerlər əsasən müxalifət tərəfdarlarının üstünlük təşkil etdiyi ərazilərdir. Lakin geniş xalq kütləsi bu çağırışlara qoşulmayıb və ticarətə dəstəyini göstərməkdə davam edir.
Bolat ölkənin güclü iqtisadiyyatla yoluna davam edəcəyini vurğulayaraq, xalqı milli iqtisadiyyata sahib çıxmağa, istehsala, ticarətə və məşğulluğa dəstək olmağa çağırıb: "Bugün iqtisadiyyata sahib çıxma günüdür, milli iqtisadiyyata sahib çıxma günüdür. Bugün istehsala, ticarətə, məşğulluğa, istehlaka sahib çıxma günüdür".
O, Türkiyənin iqtisadi uğurlarına dünya miqyasında böyük hörmət göstərildiyini qeyd edərək, daxildə aparılan destruktiv hərəkətlərin ölkənin inkişafına mane ola bilməyəcəyini bildirib.
