Moskva məhkəməsi Dağıstanın keçmiş baş naziri Əbdüsəməd Həmidov və onunla bərabər tutulan şəxslər barədə qərar verib.
Modern.az-ın məlumatına görə, o, büdcə vəsaitlərinin mənimsənilməsində ittiham olunub.
Həmidov barəsində, həmçinin rüşvət alma, vəzifə səlahiyyətlərini aşma və qanunsuz silah saxlama maddələri ilə də günahlandırılıb. Lakin son iki ittiham üzrə müddət keçdiyi üçün cəza tətbiq edilməyib.
Məhkəmənin qərarına əsasən, Həmidov 13 il müddətinə azadlıqdan məhrum edilib.
Əbdüsəməd Həmidov kimdir?
Həmidov Əbdüsəməd Mustafa oğlu 21 aprel 1966-cı ildə Dağıstanın Levaşin rayonunun Mekeqi kəndində anadan olub. O, 1996-cı ildə Mahaçqalada qətlə yetirilən Rusiya Dövlət Dumasının keçmiş deputatı və Dağıstanın maliyyə naziri olmuş Həmid Həmidovun qardaşıdır.
1989-cu ildə Dağıstan Politexnik İnstitutunu bitirib. KİV-lərin məlumatına görə, 1990-cı illərdə Beynəlxalq Biznes və Hüquq İnstitutunu da bitirib. 1984-1986-cı illərdə orduda xidmət edib. 1989-cu ildən Dağıstanın “Dinamo” İdman Cəmiyyəti yanında idman qurğuları üzrə təlimatçı kimi çalışıb.
1991-1992-ci illərdə qardaşı Həmid tərəfindən qurulan “Elbin” kommersiya bankının filialında texniki direktor olub. 1993-cü ildə bankın idarə heyətinin sədri təyin edilib. Bir il sonra Dağıstanın Sberbank şöbəsinin sədr müavini vəzifəsinə təyin olunub.
1995-ci ildə Dağıstan Xalq Məclisinin birinci çağırış deputatı seçilib. 1996-cı ildə qardaşı Qamidin qətlə yetirilməsindən sonra Dağıstanın maliyyə naziri vəzifəsini tutub.
2000-ci ilin noyabrında İsrailə terrorçu tərəfindən qaçırılan Tu-154 təyyarəsinin göyərtəsində olub.
2013-cü ildə Dağıstan Respublikası hökumətinin sədri təyin edilib. 2018-ci ildə isə iki müavini və Dağıstanın təhsil naziri ilə birlikdə büdcə vəsaitlərinin mənimsənilməsi ittihamı ilə saxlanılıb və Moskvaya aparılıb.
2019-cu ildə Moskvanın Lefortov Rayon Məhkəməsi Həmidov və onun müavini Rayudin Yusufovun xaricilərin müvəqqəti saxlanılması üçün xüsusi müəssisənin yenidən qurulmasına ayrılan 41 milyon rublun mənimsənilməsində təqsirli olduqlarını təsdiqləyib. Onlara müvafiq olaraq altı yarım və beş yarım il həbs cəzası verilib.
Həmidov iqtisad elmləri namizədi, Dağıstan Güləş Federasiyasının prezidenti olub. O, sərbəst güləş üzrə beynəlxalq dərəcəli idman ustasıdır (1988-ci ildə RSFSR çempionu, 1989-cu ildə SSRİ çempionatının bürünc mükafatçısı, 1985-ci ildə dünya çempionatının qalibi).
Evlidir və altı övladı var.
