Bu həftə Türkiyənin ana müxalifətdə olan Cümhuriyyət Xalq Partiyasının (CHP) qurultayı keçiriləcək.
Modern.az-ın məlumatına görə, aprelin 6-da keçiriləcək qurultayda hazırkı CHP sədri Özgür Özəlin yenidən namizəd olacağı bildirilir.
Qurultayda partiyanın keçmiş sədri Kamal Kılıçdaroğlunun da namizədliyi müzakirə olunur. Həmçinin, Kılıçdaroğlunun başqa namizədi dəstəkləyə biləcəyi barədə xəbərlər yayılıb.
Kılıçdaroğlunun bu məsələ ilə bağlı qərarını dəqiqləşdirmədiyi bildirilsə də, Bakırköy bələdiyyəsinin keçmiş sədri Bülent Kərimoğlu onun namizədliyi üçün imza toplamağa başladıqlarını bildirib. Kılıçdaroğlu növbədənkənar qurultay qərarını müsbət hesab etdiyini açıqlasa da, namizədliyi ilə bağlı dəqiq açıqlama verməyib.
“Sözcü” qəzetinə açıqlama verən siyasətçi partiya sədri olduğu ilk müddətdən bəri heç vaxt “mən partiya başqanlığına namizədəm” demədiyini xatırladıb. "Qurultay kimi seçərsə, sədr o olacaq", - Kılıçdaroğlu bildirib.
CHP daxilində bir qrup şəxs Kılıçdaroğlunun namizəd olması lazım olduğunu iddia edir və onun namizədliyini irəli sürmək üçün imza toplamağa başlayıb.
Bu adlar arasında ilk sırada Bülent Kərimoğlu gəlir. O deyib ki, Kılıçdaroğlunun özü prezidentliyə namizəd olmaq niyyətində deyil: "Ancaq partiyanın birliyini və bütövlüyünü qorumaq üçün CHP-nin keçirdiyi bu travmatik prosesdə üzərinə düşən vəzifəni öz üzərinə götürməli olduğunu düşünürük. Bu mövzuda israr edir və çağırırıq".
Kərimoğlu Kılıçdaroğlunun namizədlik istəyinə biganə qala bilməyəcəyini bildirib: "Təxminən 600-ə yaxın nümayəndənin imzası və çağırışı ilə Kamal bəyə namizədliyini irəli sürməsi üçün təzyiq edirik. Cümə axşamı axşamına qədər işimizi davam etdirəcəyik. Hazırda çağırış üçün 450-500 imza toplamışıq və bunu 600-dən çox olanda, cənab Kamal bu çağırışa biganə qala bilməz. Cənab Kamal namizəd olmaq fikrində deyil, amma məsuliyyət daşıyır, partiyasının və ölkənin maraqlarını düşünür. Bu 600 imza toplandıqda, namizəd olmaq istəməsə belə, zorla evindən aparıb qurultay zalına aparıb, namizəd olması üçün təzyiq edəcəyik”.
CHP-nin sədr müavini Burhanəddin Bulut deyib ki, növbədənkənar qurultayla bağlı çox böyük gözləntilər olmamalıdır. Qurultay qərarının xüsusi vəziyyətə görə verildiyini xatırladan Bulut deyib ki, 5 faiz imza toplayan hər kəs namizəd ola bilər.
CHP daxilində Kılıçdaroğlunun namizədliyi ilə bağlı qərarını toplanacaq imza sayına görə verəcəyi deyilir. Bayramla əlaqədartətildə olduğu deyilən Kılıçdaroğlunun qurultaya qatılıb-qatılmayacağı bəlli deyil.
Partiyadaxili bəzi müxaliflər Kılıçdaroğlunun özü olmasa da, başqasını irəli sürə biləcəyini deyirlər: "Cənab Kamal bilir ki, ona neçə nümayəndə səs verəcək. O, hazırda bunları dəyərləndirir. Əgər namizəd olub, uduzsa, bu, onun siyasi həyatı üçün dönməz bir proses olacaq. Digər tərəfdən, partiyada baş verə biləcək mümkün inkişaflara qarşı xeyli sayda nümayəndənin birləşdirilməsi lazımdır. Bu səbəbdən o, növbədənkənar qurultayda namizəd olmaya bilər və nümayəndələr dağılmaması üçün başqasını irəli sürə bilər", - partiya daxilindəki mənbələr BBC-yə belə deyib.
Bəzi mənbələr isə qurultaydan sonra CHP daxilində parçalanmaların ola biləcəyini bildirib. Belə ki, partiya məclisində ancaq Özgür Özəlin istədiyi şəxslər olarsa, Kılıçdaroğluna yaxın siyasətçilər istefa verə bilər.
