Cümhuriyyət Xalq Partiyasının (CHP) bu gün keçirilən qurultayında yenidən sədr seçilən Özgür Özəlin Türkiyə Prezidenti Rəcəb Tayyib Ərdoğanla bağlı sözləri nazirlərin sərt reaksiyasına səbəb olub.
Modern.az TRT-yə istinadən xəbər verir ki, nazirlər sosial media hesablarında bu barədə paylaşım ediblər.
Daxili işlər naziri Ali Yerlikaya: “Xalqımızın azad iradəsi ilə seçilmiş Cənab Prezidentimizə və legitim hökumətimizə "xunta" demək, seçkini, milli iradəni və demokratiyanı hədəfə almaq deməkdir. Bu ifadə nə siyasi tənqid, nə də müxalifətçilikdir; bu, birbaşa xalqa təhqirdir. Legitim hökumətə "xunta" demək, ya tarixi bilməməkdir, ya da bilərək yalan danışmaqdır.”
Vitse-prezident Cevdet Yılmaz: “Xalqın seçdi şəxsə "xunta" demək, əslində xalqı "xuntaçı" adlandırmaqdır. Bu, milli iradəni görməzdən gəlməkdir.”
Kommunikasiya İdarəsinin rəhbəri Fahrettin Altun: “Xalqın iradəsinə ömrünü həsr etmiş Prezidentimizə "xunta başçısı" demək ən yüngül ifadə ilə siyasi əxlaqsızlıq və həddini aşmaqdır. Xalqımız, 27 Mayda, 12 Sentyabrda, 28 Fevralda və 15 İyulda nümayiş etdirilən zehniyyəti yaxşı tanıyır və bu zehniyyətin müasir təmsilçilərinə layiqli cavabı sandıqda və hər qanuni platformada verməyə davam edir.”
Xarici işlər naziri Hakan Fidan: “Artıq həddini bil! Prezidentimiz Cənab Rəcəb Tayyib Ərdoğan illərdir xalqdan aldığı dəstəklə Türkiyəyə xidmət edir və hər cür vesayetə qarşı mübarizə aparır. Legitimliyi sandıqda deyil, küçədə axtaran, xarici güclərdən yardım uman, korrupsiya istintaqından qəhrəmanlıq çıxarmağa çalışan şəxs Özgür Özəldir.”
Ədliyyə naziri Yılmaz Tunç: “Xalqın səsi ilə seçilmiş ilk prezidentə "xunta başçısı" demək, demokratik legitimliyi inkar etmək və xalq iradəsinə dözümsüzlüyün etirafıdır.”
