ABŞ-ın Filadelfiya şəhərində yerləşən zooparkda nadir və nəsli kəsilməkdə olan qalapaqos tısbağaları ilk dəfə valideyn olublar.
Modern.az xəbər verir ki, bu barədə zoopark məlumat yayıb.
Təxminən 100 yaşında olan “Mommy” ləqəbli dişi tısbağa və onun 96 yaşlı partnyoru “Abraçço”nın övladları dünyaya gəlib.
İlk bala 27 fevralda yumurtadan çıxıb, daha sonra digərləri doğulub. Balaların çəkisi 70-80 qram arasında dəyişir.
Hazırda bala tısbağalar ziyarətçilərdən uzaqda saxlanılır və normal şəkildə böyüyürlər. Onların ictimaiyyətə ilk dəfə 23 aprel tarixində təqdim olunacağı planlaşdırılır.
"Mommy" bu yaşda ilk dəfə ana olan ən yaşlı qalapaqos tısbağasıdır. Zooparkın direktoru Co-Elli Moqerman bu hadisənin həm elmi, həm də ictimai baxımdan çox sevindirici olduğunu bildirib.
Qeyd edək ki, qalapaqos tısbağaları təbii mühitdə nəsli tükənməkdə olan canlılardandır və ABŞ zooparklarında cəmi 50-yə yaxın belə tısbağa saxlanılır.
