Martın 30-da Böyük Britaniyanın “The Economist” jurnalı Ukrayna hökumətindəki mənbəyə istinadən ölkədə iyulda prezident seçkilərinin keçirilə biləcəyi barədə məlumat yayıb. İddiaya görə, Volodimir Zelenski öz ofisinə atəşkəs əldə edildikdən sonra səsvermənin təşkili ilə bağlı işə başlamağı tapşırıb. Ancaq Ukraynanın rəsmi qurumları iddiaları təkzib edib.
Buna baxmayaraq, Zelenskinin gələcəyi ilə bağlı müzakirələr intensivləşib. Zelenskinin prezidentlik müddəti 2024-cü ilin may ayında başa çatsa da, hərbi vəziyyətə görə seçkilər təxirə salınıb. Rusiya Prezidenti Vladimir Putin onun legitimliyini şübhə altına alıb və Zelenskinin “qanunsuz statusda” olduğunu, sülh danışıqlarında iştirak hüququnun olmadığını bildirib. Zelenski isə hərbi vəziyyətdə seçkinin mümkün olmadığını müdafiə edir.
Ukrayna parlamentinin sabiq sədri, deputat Dmitro Razumkov bildirib ki, Ukraynada hakimiyyət dəyişikliyi üçün yeganə yol prezident seçkilərinin keçirilməsidir. Bundan qabaq da ABŞ lideri Zelenskinin seçkilərə getməsini söyləyib. Zelenski özü də çıxışlarının birində Ukrayanın xeyrinə olacağı təqdirdə seçkilərə getməyə hazır olduğunu qeyd edib.
Modern.az-a açıqlamasında Ukrayna Azərbaycanlıları Birləşmiş Diasporunun mətbuat katibi Qalib Osmanlı bildirib ki, lazımı şərait yaranarsa, ən gec payızda seçki keçirilə bilər:
"Ukraynanın seçkilərə getməsi üçün atəşkəs elan olunmalıdır. Çünki konstitusiyaya görə müharibə şəraitində seçki keçirilə bilməz. Konstitusiyanın 108-ci maddəsinə əsasən Volodimir Zelenski prezident səlahiyyətini davam etdirir. Razmikovun dediyinə görə seçki keçirilərsə, atəşkəs elan olunmalı, müharibə şəraiti aradan qaldırılmalıdır. Seçkilərin vaxtı sekçi komissiyası tərəfindən müəyyən edilməli və namizədlərin verilməsi mərhələsinə başlanılmalıdır. Bu da vaxt aparan prosesdir. Ən azı 3-6 ay ərzində bu proseslər həyata keçirilə bilər. Dediklərim baş tutarsa, ən tez yay aylarında, ən gec isə payız aylarında prezident seçkilərinə gedilə bilər. Bu tərəflər-Rusiya və Ukrayna arasında atəşkəs sazişi imzalanarsa, baş tuta bilər. Lakin atəşkəs sazişi imzalanmasa, heç bir halda seçkilər keçirilə bilməz".
Q.Osmanlı Dmitro Razumkovun namizədliyi məsələsinə də toxunub:
"Razumkovun Ukraynada müxtəlif çevrələrdə nüfuzu və reytinqi var. Zelenski hakimiyyətinin ilk dövrlərində Ali Radanın spikeri olub. O da namizədliyini verib gücünü sınaya bilər. Zelenskini kim əvəz edəcək sualına əvvəlcədən cavab vermək olmaz. Bu seçki zamanı müəyyənləşə bilər. Bunu əvvəlcədən heç kəs deyə bilməz. Dediyim hallar baş verərsə, xalqın iradəsi nədir, o da olacaq".
