İsrail Baş naziri Benyamin Netanyahu ABŞ Prezidenti Donald Trampla görüşdən sonra mətbuata birgə açıqlama verib. 

Modern.az xəbər verir ki, Netanyahu Suriyada Türkiyə ilə mümkün qarşıdurmanın qarşısını almaq üçün Trampdan vasitəçilik etmək istəyib.

"Türkiyə ilə Suriyada qarşıdurma niyyətimiz yoxdur", - o deyib.

Netanyahu Türkiyə Prezidenti Rəcəb Tayyib Ərdoğanla Tramp arasında yaxşı münasibətləri n olduğunu vurğulayıb:

“Biz bu qarşıdurmanın qarşısını necə ala biləcəyimizi müzakirə etdik. Məncə, Tramp bu məsələdə ən yaxşı vasitəçi ola bilər,” - o qeyd edib.

Donald Tramp isə açıqlamasında Türkiyə Prezidenti Rəcəb Tayyib Ərdoğan haqqında yüksək fikirlər səsləndirib: “Ərdoğanı çox sevirəm, o da məni sevir. Bu isə medianı qıcıqlandırır.”

“Əgər İsrailin Türkiyə ilə problemi varsa, onu mən həll edə bilərəm", - o əlavə edib.

Tramp Türkiyə və onun lideri ilə çox yaxşı münasibəti olduğunu xatırladıb.

"Türkiyəyə təbriklər. Mən Ərdoğana dedim ki, siz 2000 ildə heç kimin edə bilmədiyini etdiniz – Suriyanı ələ keçirdiniz”, - deyə o vurğulayıb.

ABŞ lideri Ərdoğanı “çətin və ağıllı lider” kimi xarakterizə edib.

“Əgər Türkiyə ilə bağlı hər hansı problemin olarsa, mən onu həll edə bilərəm, amma sən də məntiqli olmalısan,” – deyə Tramp Netanyahuya cavab verib.