ABŞ Donald Tramp 79 illiyini təmtəraqlı hərbi paradla qeyd etməyi planlaşdırır. Onun doğum günü – 14 iyun tarixi ABŞ ordusunun yaradılmasının 250 illiyinə təsadüf edir.
Modern.az ABŞ mətbuatına istinadən xəbər verir ki, Tramp həmin gün Arlinqtondan Vaşinqtona qədər, təxminən 6.4 kilometrlik hərbi yürüş təşkil etməyi düşünür.
Ağ Ev bu xəbəri rəsmi olaraq təkzib edib və bildirib ki, “heç bir parad planlaşdırılmayıb”, ancaq ABŞ ordusunun nümayəndələri ehtiyatla danışıblar. Polkovnik Devid Batler bildirib ki, hələlik paradın olub-olmayacağını demək tezdir: "Lakin biz tədbirin milli səviyyədə qeyd olunması üçün bir neçə dövlət agentliyi ilə əməkdaşlıq edirik”.
Vaşinqton və Arlinqton yerli rəhbərləri isə Trampın bu planlarına etiraz ediblər. Vaşinqton meri Müril Bouzer mətbuat konfransında qeyd edib ki, bu cür tədbir yolların ciddi şəkildə zədələnməsinə səbəb ola bilər. “Küçələrimizdə tanklara ehtiyac yoxdur”, – deyə Bouzer vurğulayıb.
Arlinqton dairəsi şurasının sədri Takis Karantonis isə bildirib ki, hərbi paradın təmtərağı ilə ölkədəki sosial qeyri-müəyyənlik arasında balans qorunmalıdır. O, federal hökumətin Tramp və onun idarəetməsindəki Elon Mask tərəfindən başladılan ixtisarlar səbəbindən iş yerlərini itirən hərbçilər və veteranların durumunu nəzərə almalı olduğunu bildirib.
CNN kanalı da Trampın planını tənqid edib. Aparıcı Erin Bernett bu tipli paradların daha çox Çin, Rusiya və Şimali Koreya kimi ölkələrdə müşahidə olunduğunu qeyd edib. Onun sözlərinə görə, paradda tanklar, taktiki maşınlar və canlı hərbi qüvvənin iştirakı gözlənilir.
Xatırladaq ki, Tramp prezidentliyinin ilk dövründə də oxşar təşəbbüslə çıxış edib. 2017-ci ildə Fransada Bastiliya Günündə keçirilən hərbi paraddan ilhamlanan Tramp ABŞ-da da bənzər tədbir keçirmək istəsə də, yüksək xərclər səbəbilə bu ideyasını gerçəkləşdirə bilməyib. Həmin vaxt tədbirin dəyəri minimum 21.6 milyon, maksimum isə 92 milyon dollar olaraq qiymətləndirilmişdi.
"Böyük hərbi parad üçün bizdən istənilən vəsait o qədər gülünc dərəcədə yüksək idi ki, tədbiri ləğv etdim", Tramp bildirib.
