Moskvada mayın 9-da Qələbə paradı keçiriləcək. Hər il keçirilən parad Rusiya və onun lideri Vladimir Putin üçün təkcə tarixi hadisənin anılması deyil, həm də siyasi təbliğat alətidir. Ukraynaya qarşı müharibənin davam etdiyi bir dövrdə bu ilki parad daha böyük diqqət mərkəzindədir. Kreml üçün bu tədbir həm “faşizmə qarşı mübarizə” simvoludur, həm də Rusiya ətrafında siyasi dəstək nümayiş etdirmək imkanıdır.
Bu il paradda Çin lideri Si Cinpin, Vyetnam Kommunist Partiyasının baş katibi To Lam, Belarus prezidenti Aleksandr Lukaşenko, Braziliya prezidenti Lula da Silva, Kuba lideri Migel Dias-Kanel, Serbiya prezidenti Aleksandar Vuçiç və Ermənistan baş naziri Nikol Paşinyanın iştirak edəcəyi gözlənilir.
Avropa İttifaqının xarici siyasət rəhbəri Kaya Kallas bəyan edib ki, 9 May paradında iştirakın siyasi nəticələri olacaq. Onun sözlərinə görə, Aİ-yə namizəd ölkələrin bu tədbirdə görünməsi qəti şəkildə istənilmir: “Çoxlu sayda xarici işlər naziri bildirdi ki, Aİ bu səfərləri ciddi qəbul edir və nəticələri olacaq. Biz aydın şəkildə dedik ki, namizəd ölkələrin Moskvadakı tədbirlərdə iştirakını istəmirik.”
Kallasın açıqlaması Rusiya tərəfindən sərt reaksiya ilə qarşılanıb. Dövlət Dumasının sədri Vyaçeslav Volodin onu “rusofob” adlandırıb və Kallasın BMT-nin beynəlxalq tribunalına verilməli olduğunu qeyd edib.
Modern.az xəbər verir ki, 9 May paradı ətrafında müzakirələrin davam etdiyi bir vaxtda tədbirdə iştirak edəcək liderlər arasında bir nəfərin adı xüsusi maraq kəsb edib.
Belə ki, Paşinyanın Moskvada görünməsi onun son aylarda nümayiş etdirdiyi “Avropayönlü” kursla ziddiyyət təşkil edir. Ermənistan lideri Aİ ilə münasibətləri gücləndirmək, Qərblə təhlükəsizlik və siyasi əməkdaşlığı genişləndirmək yönündə addımlar atdığını desə də, Rusiyanın təşkil etdiyi simvolik tədbirdə iştirak etməyə hazırlaşır. Bu, rəsmi İrəvanın xarici siyasətində ardıcıllıq məsələsini sual altına alır.
Paşinyanın 9 May paradında iştirakı hələlik hüquqi baxımdan Aİ sanksiyalarına səbəb olacaq səviyyədə dəyərləndirilmir. Lakin bu addım Aİ-nin siyasi dairələrində ciddi narazılıq doğura və Avropanın qəzəbinə səbəb ola bilər. Avropa İttifaqı ona qarşı birbaşa sanksiyalar tətbiq etməsə də, maliyyə və diplomatik dəstəyin azalması ehtimalı istisna olunmur.
Modern Təhlil və Araşdırma Qrupu
