Romada Tehranın nüvə proqramı ilə bağlı böhranın həlli üçün ABŞ və İran arasında danışıqların ikinci raundu başa çatıb.
Modern.az xəbər verir ki, bu barədə "Mehr" agentliyi məlumat yayıb.
“Çox güman ki, İran, Oman və ABŞ nümayəndə heyətləri yaxın günlərdə danışıqların üçüncü raundunu keçirəcək”, - agentlik qeyd edib.
Danışıqların məqsədlərinə ölkələr arasında ədalətli, məcburi və davamlı razılaşmaya doğru irəliləyişin əldə edilməsi daxildir. İran nümayəndə heyətini bu ölkənin xarici işlər naziri Abbas Əraqçi, Amerika komandasını isə ABŞ prezidenti Donald Trampın xüsusi nümayəndəsi Stiv Vitkoff təmsil edib. Danışıqlar Oman səfirinin iqamətgahında baş tutub.
İran və ABŞ arasında danışıqların ilk raundu aprelin 12-də Omanda baş tutub . Üç saata yaxın davam edən görüşdə iki ölkənin nümayəndələri İranın nüvə proqramı və İrana qarşı sanksiyaların ləğvi məsələsini müzakirə ediblər.
