Ukrayna Rusiyanın atdığı addımlara eyni cavabı verəcək.

Modern.az xəbər verir ki, bu barədə Ukrayna Prezidenti Volodimir Zelenski bildirib.

"Sükut qarşılığında sükut, hücumlara qarşı müdafiə xarakterli zərbələr", - o qeyd edib.

Zelenski vurğulayıb ki, əgər 20 aprel Pasxa günü üçün elan edilmiş atəşkəs həqiqətən qüvvədə qalarsa, Ukrayna bu sülh vəziyyətinin uzadılmasını təklif edir: "Bu, Rusiyanın əsl niyyətlərini göstərəcək. Çünki 30 saatlıq atəşkəs yalnız başlıqlar üçün yetərlidir, amma etimadın möhkəmləndirilməsi üçün deyil".

O əlavə edib ki, axşam saatlarında Ukrayna Silahlı Qüvvələrinin Baş komandanı Aleksandr Sırskiyindən cəbhədəki vəziyyətlə bağlı ətraflı hesabat gözləyir.

Ukrayna Silahlı Qüvvələrinin yüksək rütbəli zabiti BBC-yə bildirib ki, həm onun bölməsi, həm də digər hərbi hissələr Rusiya tərəfindən elan olunmuş “Pasxa atəşkəsi” qüvvəyə mindikdən dərhal sonra Rusiya mövqelərinə atəşi dayandırmaq əmri alıb. Onun sözlərinə görə, eyni zamanda mümkün atəşkəs pozuntularının foto və video sübutlarının toplanması və zəruri hallarda cavab atəşi açılması əmri də verilib.

Qeyd edək ki, Rusiya Prezidenti Vladimir Putin 19 aprel saat 18:00-dan (Moskva vaxtı ilə) 21 aprel saat 00:00-a qədər Ukraynada birtərəfli atəşkəs elan edib. O bildirib ki, bu “Pasxa atəşkəsi” Ukrayna tərəfinin də eyni qaydada əməl etməsi şərti ilə qüvvədə olacaq.

Putin bu qərarı Rusiya Silahlı Qüvvələrinin Baş Qərargah rəisi Valeri Gerasimovla Kreml görüşündə açıqlayıb: “Bu müddət ərzində bütün döyüş əməliyyatlarının dayandırılmasını əmr edirəm. Eyni zamanda qoşunlarımız mümkün təxribatlara və atəşkəsin pozulmasına qarşı hazırlıqlı olmalıdır”, – deyə Rusiya prezidenti vurğulayıb.