Roma Papası Fransisk vəfat edib. O, 88 yaşında uzun sürən xəstəlikdən sonra vəfat edib
Fevralın 14-də Papa Fransisk bronxit diaqnozu ilə xəstəxanaya yerləşdirilib. Ona ikitərəfli pnevmoniya diaqnozu qoyulub və bir neçə dəfə süni nəfəs aparatına qoşulub. Martın 23-də Fransisk 38 gün xəstəxanada qaldıqdan sonra Vatikana qayıdıb. Ötən gün o, Vatikanın Müqəddəs Pyotr meydanında Pasxa bayramı ilə əlaqədar müraciət edib.
Modern.az xatırladır ki, Papa Fransisk papalıq tarixində ən fərqli fiqurlardan biri kimi yadda qalıb.
Jorge Mario Bergoglio adı ilə tanınan Fransis 1936-cı ildə Buenos-Ayresdə italiyalı mühacir ailəsində doğulub. Kimya laboratoriyasında texnik kimi çalışdıqdan sonra ruhani olmağa qərar verib. 21 yaşında iezuit ordeninə daxil olub. Həmin illərdə sətəlcəm keçirib və bir ağciyərinin üst hissəsi götürülüb.
1969-cu ildə iezuit keşişi təyin olundu. Argentinada hərbi diktatura (1976–1983) dövründə onun rolu mübahisəli olub, lakin Vatikan onun insan haqları pozuntularına qarşı səssiz qalması ilə bağlı ittihamları rədd edib.
O, 2013-cü ildə Roma Papası seçilib. XVI Benediktin istefasından sonra seçilən Fransisk 1300 ildən sonra Avropa xaricindən seçilən ilk papa idi. Onun argentinalı olması və islahatlara meyilli siyasəti Katolik Kilsəsindəki mühafizəkar və liberal qarşıdurmalarını dərinləşdirdi.
Adını yoxsulluq, sülh və təbiət sevgisi ilə tanınan Müqəddəs Fransiskdən aldı. İlk çıxışında ənənəvi "İsa Məsihə alqış!" yox, sadəcə "Axşamınız xeyir, bacı və qardaşlar" deməsi ilə yadda qalıb. ilə hərəkət etdi.
Əvvəlki papalardan fərqli olaraq dəbdəbədən imtina edib, daha sadə və xalqla yaxın üslubu ilə seçilib.
Papal iqamətgahda deyil, Vatikan mehmanxanasında qalırdı. Zirehli limuzin yerinə sadə "Ford Focus" model avtomobildən istifadə edirdi.
Fransiskin LGBT icmasına qarşı daha açıq və mərhəmətli yanaşması, qadınların və qeyri-xristianların dini mərasimlərə cəlb olunması mühafizəkar dairələrdə narazılığa səbəb olub. O, Latın dilində keçirilən ənənəvi ayinləri məhdudlaşdırdı və eyni cinsli cütlüklərin müəyyən şərtlərlə xeyir-dua ala biləcəyini bildirdi. Bu qərar ABŞ-də və Avstraliyada bəzi yüksək rütbəli kilsə nümayəndələrinin sərt tənqidinə səbəb oldu.
Fransiskin dövründə Vatikanda aparılan islahatlar nəticəsində qadınlar Kilsənin mərkəzi idarəsində daha çox təmsil olunmağa başladı. O, həmçinin ölüm hökmünü hər şəraitdə qəbuledilməz elan edib, nüvə silahlarına və silah sənayesinə qarşı kəskin mövqe sərgiləyib.
Papa Fransisk 45-dən çox ölkəyə səfər edib. Ərəb Yarımadasını ziyarət edən ilk papa olub. Müsəlman liderlərlə birlikdə dinlərarası qardaşlıq haqqında sənəd imzalayıb. Bu, konservativ çevrələrdə “xəyanət” kimi qiymətləndirilib.
Ukrayna müharibəsinin başlandığı gündən etibarən o, daimi olaraq sülh çağırışları edib. HƏMAS tərəfindən əsir götürülənlərin azad olunması üçün çağırışlar etsə də, İsrailin Qəzzada apardığı hərbi əməliyyatlara qarşı çıxışı da ciddi rezonans doğurub.
COVID-19 pandemiyası dövründə Fransisk virtual görüşlər keçirərək insanlara həmrəylik və ədalət çağırışları edib. O, pandemiyanı qlobal bərabərsizliklərin aradan qaldırılması üçün bir fürsət kimi qiymətləndirib. Bununla belə, onun papalığı dövründə də Vatikan maliyyə qalmaqallarından xilas ola bilməyib
Fransiskin təşəbbüsü ilə korrupsiyada ittiham olunan kardinal Beççu məhkəməyə çıxarılıb və 2023-cü ildə bir neçə maddə üzrə günahkar bilinərək beş il yarım həbs cəzası alıb. Eyni zamanda, o, müsəlman liderlərlə tarixdə ilk dəfə ortaq sənəd imzalayaraq dinlərarası dialoqa yeni mərhələ gətirib.
Fransisk Papa vəzifəsini yalnız dini deyil, sosial və siyasi məsuliyyət kimi də qəbul edirdi. O, təkcə Katolikləri deyil, bütün dünyanı daha ədalətli və mərhəmətli gələcəyə dəvət edirdi.
