Ötən gün İstanbulda baş verən 6,2 bal gücündə zəlzələdən sonra şəhər sakinlərinin bəziləri gecəni küçədə keçiriblər.

Modern.az yerli mediaya istinadən xəbər verir ki, insanlar qorxu və təhlükəsizlik səbəbilə evlərinə qayıtmayəblar, küçələrdə, məktəb həyətlərində, idman zallarında və məscidlərdə gecələyiblər.

Fövqəladə Halların İdarə Olunması Agentliyi (AFAD) hadisə ilə bağlı açıqlama verərək insan tələfatı və ciddi dağıntılar barədə məlumat daxil olmadığını bildirib.

Milli təhsil naziri Yusuf Tekin məktəblərdə dərslərin cümə axşamı və cümə günləri təxirə salındığını açıqlayıb. Ali Təhsil Şurasının (YÖK) sədri Erol Özvar da dövlət və özəl universitetlərdə dərslərin eyni günlərdə dayandırıldığını bildirib.

Dövlət qurumlarında çalışan hamilə qadınlar, fiziki məhdudiyyətli şəxslər, qazilər və 10 yaşından kiçik övladı olan analar üçün də iki gün inzibati məzuniyyət elan olunub.

Türk Qızıl Aypara Cəmiyyəti (Kızılay) və AFAD əhaliyə əsas ehtiyacların qarşılanması üçün səfərbər olub. AFAD, həmçinin zədələnmiş binalara daxil olmamağa çağırış edib.

Daxili İşlər naziri Ali Yerlikaya aprelin 23-d baş verən zəlzələ ilə bağlı ətraflı məlumat verib. Onun sözlərinə görə, zəlzələ 13 saniyə davam edib və 15:12-yə qədər ən güclüsü 5,9 bal olmaqla ümumilikdə 51 afterşok qeydə alınıb.

Zəlzələ saat 12:49-da Silivri açıqlarında, 6,92 kilometr dərinlikdə baş verib. Təxminən bir saat sonra 5,9 bal gücündə ikinci bir təkan da hiss olunub.

AFAD-ın paylaşdığı məlumatda 12:49-da Mərmərə dənizində, Silivri yaxınlığında 6,2 bal gücündə zəlzələ baş verdiyi qeyd olunub.