İrəvanda ötən gün qondarma "erməni soyqırımı"na həsr olunmuş məşəl yürüşü keçirilib. Bu zaman ermənilər Azərbaycan və Türkiyə dövlət bayraqlarını yandırıblar.

Modern.az-a açıqlamasında Milli Məclisin Müdafiə, təhlüksəzilik və korrupsiya ilə mübarizə komitəsinin üzvü, Xocalıdan olan deputat Elman Məmmədov bildirib ki, ermənilər Azərbaycan və Türkiyə dövlət bayraqlarını yandırırlarsa, sülhdən danışmaq mümkün deyil:

“Bu hadisələr ardıcıl olaraq uzun illərdir ki, davam edir. Hər il özlərinin bizə-türk müsəlmanlara, azərbaycanlılara qarşı törətdikləri hərkətlərini bizim adımıza yazıb “erməni soyqırımı” kimi dünyaya təqdim ediblər. Hətta Sovet hökuməti də bunlara belə hərəkət etməyə icazə verirdi. Hər il aprelin 24-də yaramaz, murdar hərəkətlər  edirdilər. Hətta Qərbi Azərbaycanlılar öz yurd-yuvalarında yaşadıqları zamanlarda onların aprelin 24-də müəyyən yerlərdə küçəyə çıxmasını, tədbirlər keçirməsini qadağan etmişdilər. Bu gün də ermənilərin hərəkətləri  davam edir. Ermənilər maraqları çərçivəsində özlərinəməxsus hiyləgərliklərini işə salıb dünyaya bəyan edirlər ki, Türkiyə ilə birgə yaşamağa, sərhədlərin açılmasına və Azərbaycanla sülh sazişi imzalamağa hazırdılar. Bunu dildə deyirlər,  əməlləri isə türk və Azərbaycan düşmənçiliyidir. Onlar bu gün dövlət bayrağımızı yandırıb, bizə qarşı düşmənçilik, faşist ideologiyasına əsaslanan şüarlar səsləndirirlərsə, bir ucdan silahlanmanı davam etdirirlərsə, hansı sülhdən danışmaq mümkündür, bunlara necə etibar etmək olar? İrəvanda törətdikləri son təxribat bunların əsl üzlərini, bizə münasibətlərinin necə olmasını, gələcək üçün hansı məkrli planlar hazırladıqlarını bir daha təsbit edir".

E. Məmmədov Paşinyanın hadisə ilə bağlı çıxışını isə "tülkülük" adlandırıb:

"Paşinyan əgər bunun əleyhinədirsə, onda  Ermənistanda kifayət qədər hüquq-mühafizə qüvvələrinin imkanları var ki bunların qarşısını alsın. Amma özləri də iştirak edirlər. Paşinyan da artistlik, təlxəklik edərək bunun əleyhinə  bəyanatlar verir. Əslində isə Paşinyan həmişə qatı düşmənlərdən biri olub. İndi Baş nazir olduğu üçün dünyaya özünü mədəni,sülhpərvər kimi  qələmə verir. Həqiqətdə isə iç üzü başqadır".

Deputat Avropanın səssiz qalmasından da danışıb:

"Avropa bu işğalçı, terrorçu dövlətlə bünövrədən əlbirdir. Osmanlını parçalayıb, bölüşdürmək məsələsində  həmin Avropa dövlətləri ermənilərə də yer ayırmışdı. Həmin Avropa dövlətləridir, sadəcə olaraq tarix, xarici görünüşləri, geyimləri dəyişib. İç üzləri, ideologiyaları isə olduğu kimi qalır. Bunlar ermənilərə qarşı heç bir cəza tədbiri görməyiblər, görmürlər və görməyəcəklər. Əksinə erməniləri bu bölgədə əllərində alət kim istifadə ediblər,  bu gün də edirlər, gələcəkdə də edəcəklər".