İsrailin Baş naziri Benyamin Netanyahunun yaxın zamanda Bakıya səfəri planlaşdırılır.
Modern.az-ın məlumatına görə, İsrailin məşhir "Jerusalem Post" nəşrində dərc edilən məqalədə bildirilib ki, rəsmi tarix açıqlanmasa da, səfər artıq gündəmdədir.
Nəşr qeyd edir ki, Netanyahunun səfəri təkcə ikitərəfli münasibətlərin inkişafını deyil, eyni zamanda regionda güc balansının dəyişməkdə olduğunu göstərir.
Baş nazirin səfəri Azərbaycanın İsrail və Türkiyə arasında strateji körpü rolunu gücləndirməsi fonunda baş verir. Xüsusilə Suriya məsələsində Bakı iki tərəf arasında vasitəçi mövqeyindədir. Bu isə bölgədə yeni geosiyasi reallıqların yaranmasından xəbər verir.
Qeyd edək ki, bir müddət əvvəl İsrail və Türkiyə rəsmiləri Bakıda görüşüblər.
Qəzetdə dərc edilən məqalədə bildirilib ki, bu proseslər Tehranda ciddi narahatlıq doğurur. İran Azərbaycanın İsrail və Türkiyə ilə yaxınlaşmasını, xüsusilə də Suriya məsələsindəki rolunu, həm Yaxın Şərq, həm də Qafqazda öz təsir imkanlarına təhdid kimi görür. İran üçün ən ciddi itkilərdən biri Suriyada öz əsas dayağı olan Əsəd rejiminin zəifləməsidir. İsrailin Hizbullaha qarşı hava zərbələri, İranın bu bölgədəki hərbi-siyasi imkanlarını zəiflədir. Türkiyənin də regionda təsirini artırması Tehranın manevr imkanlarını daha da azaldıb.
İsrailin post-Əsəd dövrünə dair planı İranın Suriya və Livandakı hərbi varlığını zəiflətməyə yönəlib. Bu çərçivədə regiondakı tərəfdaşlarla, xüsusilə Azərbaycanla əməkdaşlıq ön plana çıxır. Rusiya-Ukrayna müharibəsi səbəbindən Moskvanın bölgədəki təsiri azaldıqca bu boşluğu Azərbaycan kimi yeni oyunçular doldurmağa başlayır.
Bu proses Vaşinqtonun da diqqətindən yayınmayıb. ABŞ Prezidenti Donald Tramp Azərbaycan Prezidenti İlham Əliyevə məktub göndərərək, Azərbaycanın İsrailə verdiyi dəstəyi və bölgədə sabitliyə töhfəsini alqışlayıb.
"Tehran isə bu tendensiyaya qarşı Ermənistanla hərbi əməkdaşlığı gücləndirib. İran və Ermənistan birgə hərbi təlimlər keçirərək “xaricdən dizayn olunmuş sərhəd dəyişikliklərinə” qarşı xəbərdarlıq ediblər. Bu isə aydın şəkildə Azərbaycana və onun müttəfiqlərinə yönəlmiş mesajdır", - məqalədə deyilir.
