Rusiya Silahlı Qüvvələrinin Baş Qərargah rəisi Valeri Gerasimov Vladimir Putinə Kurks vilayətindəki əməliyyatların tam başa çatması barədə məruzə edib.
Modern.az xəbər verir ki, bu barədə Rusiya Prezidentinin mətbuat katibi Dmitri Peskov şənbə günü məlumat yayıb.
2024-cü ilin avqustunda Ukrayna Silahlı Qüvvələri (USQ) gözlənilmədən Kurks vilayətinə hücum etmiş və təxminən 1000 kvadrat kilometr ərazini ələ keçirmişdi. Lakin Rusiya ordusu zamanla bu əraziləri yenidən öz nəzarətinə qaytara bilib.
Mart ayında Ukrayna Silahlı Qüvvələrinin Baş komandanı Aleksandr Sırski Ukrayna qüvvələrinin daha əlverişli mövqelərə çəkildiyini və Kurks vilayətindəki mövcud mövqelərini saxlayacaqlarını bildirmişdi. Onun sözlərinə görə, əməliyyatlar zamanı Rusiya tərəfi 50 mindən çox itki (öldürülən, yaralanan və əsir düşən) verib.
Bəzi müşahidəçilər Ukraynanın Kurksda ələ keçirdiyi əraziləri Moskva ilə danışıqlarda mübadilə üçün istifadə edə biləcəyini düşünürdü. Lakin hazırkı vəziyyət bu ümidləri zəiflədir. ABŞ Prezidenti Donald Trampın emissarı Stiv Uitkoffun Putinə təqdim etdiyi planlara əsasən, yalnız Xarkov vilayətinin bəzi ərazilərinin qaytarılması və Rusiya tərəfindən işğal olunmuş Ukrayna torpaqlarının nəzarətinin de-fakto tanınması nəzərdə tutulur.
Gerasimov bildirib ki, Kurks vilayətində Ukrayna ordusunun sonuncu mövqeyi — Qornal kəndinə nəzarət bərpa edilib. Onun sözlərinə görə, Kurks vilayətində döyüşlər zamanı Ukrayna ordusu 76 mindən çox hərbiçisini itirib. "Kurks vilayətində keçirilən əməliyyat zamanı Ukrayna müdafiəsi çöküb, qoşunların xaotik geri çəkilməsi başlayıb və cəbhə xəttindəki çıxıntı 5 gün ərzində 2,5 dəfə azalıb", - general deyib.
O, ilk dəfə Şimali Koreya qoşunlarının Kursk vilayətindəki əməliyyatlarda iştirak etdiyini etiraf edib.
"Koreya Xalq Demokratik Respublikasından (KXDR) olan döyüşçülər Kurks vilayətinin azad olunması əməliyyatında yüksək peşəkarlıq nümayiş etdirib", - Gerasimov bildirib.
Onun sözlərinə görə, Sum vilayətində təhlükəsizlik zonası yaradılır; burada dörd yaşayış məntəqəsi azad olunub və 90 kvadrat kilometrlik ərazi Rusiyanın nəzarətinə keçib.
