Aprelin 26-da İranın Hörmüzqan vilayətinin Bəndər Abbas şəhəri yaxınlığında yerləşən Şəhid Rəcai limanında güclü partlayış baş verib.
Modern.az xəbər verir ki, hadisə nəticəsində ölənlərin sayı 40-a yüksəlib, yaralananların sayı isə 1200-ü ötüb.
Axtarış-xilasetmə işləri davam etdiyindən bu rəqəmlərin artacağı istisna edilmir.
İran rəsmilərinin ilkin məlumatına görə, partlayışa səbəb limanda saxlanılan kimyəvi maddələrin düzgün olmayan şəkildə qorunması olub. Xarici müdaxilə ehtimalı rəsmi şəkildə inkar edilib və hadisənin səbəblərini araşdırmaq üçün təcili istintaqa başlanılıb.
Partlayış Şəhid Rəcai limanının konteyner terminalında baş verib. Partlayış nəticəsində yaranan zərbə dalğası 50 kilometr radiusda hiss olunub. Liman infrastrukturu və ətrafdakı binalar ciddi ziyan görüb, Bəndər Abbas şəhərində yüzlərlə evin şüşələri sınıb. Mütəxəssislər bu partlayışı 2020-ci ildə Livanın Beyrut limanında baş vermiş faciədən sonra ən dağıdıcı texnogen partlayış hesab edirlər.
Şəhid Rəcai limanı İslam İnqilabı Keşikçiləri Korpusuna (SEPAH) məxsus obyektlərin yaxınlığında yerləşir. Analitiklərin fikrincə, limanda partlayan kimyəvi maddələr hərbi məqsədlər üçün nəzərdə tutulmuş ola bilər. Məlumata görə, partlayan maddələr arasında raket yanacağı istehsalında istifadə olunan ammonium perxlorat və ya natrium perxlorat kimi materiallar ola bilər. Mart ayında Çindən ammonium perxloratın böyük bir partiyasının gətirilməsi barədə xəbərlər yayılmışdı.
Bununla belə, İran Müdafiə Nazirliyinin nümayəndəsi general Rza Talai-Nik bu iddiaları təkzib edərək bildirib ki, limanda hərbi təyinatlı heç bir material saxlanılmayıb.
Hadisə İran və ABŞ arasında nüvə sazişi üzrə danışıqların növbəti mərhələsinin keçirildiyi günə təsadüf edib. Rəsmi Tehran və İsrail tərəfi partlayışın arxasında İsrailin dayanması ilə bağlı iddiaları qəti şəkildə rədd edib.
İran prezidenti Məsud Pəzəşkian faciə ilə bağlı başsağlığı verib və hadisənin hərtərəfli araşdırılması üçün tapşırıq verib. Prezidentin göstərişi ilə ölkənin daxili işlər naziri İskəndər Mömini hadisə yerinə göndərilib və xilasetmə işlərinin koordinasiyası üçün tədbirlər görülüb.
Hazırda liman ərazisində xilasetmə və təmizləmə işləri davam edir. Yaralıların çoxu müxtəlif dərəcəli yanıqlar və travmalarla xəstəxanalara yerləşdirilib. Ölkənin bir çox bölgəsində insanlar qanvermə aksiyalarında iştirak edərək yaralılara yardım edirlər.
