Amerika prezidenti Donald Trampın bu ilin yanvarında hakimiyyətə gəlişindən bəri ABŞ-da azı 121 min federal hökumət işçisi işdən çıxarılıb.
Modern.az xəbər verir ki, bu barədə CNN məlumat yayıb.
Bildirilib ki, kütləvi ixtisarlar 30-a yaxın departamentə təsir edib, lakin ən çox ABŞ Beynəlxalq İnkişaf Agentliyi (USAID) zərər çəkib – bir neçə dəfə işçilərin ixtisarı aparılıb, sonra onun fəaliyyəti dayandırılıb. Təhsil Nazirliyi işçilərinin 51%-ni ixtisar edib, 12 regional idarədən 7-ni bağlayıb. ABŞ-ın Mənzil və Şəhər İnkişafı Departamenti, Səhiyyə və İnsan Xidmətləri Departamentinin bir hissəsi olan Milli Sağlamlıq İnstitutu əhəmiyyətli sayda işçisini itirib.
CNN-ə müsahibə verən ekspertlərin fikrincə, bu ixtisarların nəticələri artıq amerikalılar tərəfindən hiss olunur və hökumətin təhsil, səhiyyə və ictimai təhlükəsizlik sahələrində öz vətəndaşlarının maraqlarını təmin etmək qabiliyyətini sual altına qoyur.
İnauqurasiyadan qısa müddət sonra Tramp şişmiş hökumət aparatını ixtisar etmək və bürokratiya ilə mübarizə aparmaq üçün bir sıra tədbirlər görəcəyini açıqlamışdı.
