Rusiya Ukraynadakı münaqişənin sülh yolu ilə həlli üçün bir sıra şərtlər irəli sürüb.
Modern.az xəbər verir ki, bu barədə Rusiya Təhlükəsizlik Şurasının katibi Sergey Şoyqu BRICS ölkələrinin yüksək səviyyəli nümayəndələrinin görüşü zamanı bildirib.
Həmin şərtlər sırasına Ukrayna silahlı qüvvələrinin Rusiyanın zəbt etdiyi “yeni əraziləri”ndən çıxarılması və Kiyevin NATO-ya üzv olmaqdan imtina etməsi də daxildir.
“Ukrayna böhranının həlli ilə bağlı Rusiyanın təklifləri hamıya məlumdur: Ukrayna silahlı qüvvələrinin Rusiyanın yeni bölgələrindən çıxarılması, Kiyevin NATO-ya üzv olmaq üçün müraciət etməkdən imtinası, Ukraynanın demilitarizasiyası, rusdilli vətəndaşların hüquqlarının təmin edilməsi...”, - Şoyqu bildirib.
O, həmçinin vurğulayıb ki, Moskvanın Ukraynanın danışıqlara hazır olması ilə bağlı heç bir illüziyası yoxdur. Lakin qeyd edib ki, Rusiya və ABŞ münaqişənin həlli yollarını tapmaq üçün birgə iş perspektivlərini artıq açıqlayıb.
Şoyqunun sözlərinə görə, Avropa əksinə, qarşıdurmanın uzadılmasında maraqlıdır və əldə olunan razılaşmaları yerinə yetirməmək üçün Kiyevə təzyiq göstərir.
Təhlükəsizlik Şurasının katibi Moskvanın Avropa qoşunlarının Ukrayna ərazisinə yerləşdirilməsini qəbuledilməz hesab etdiyinə də diqqət çəkib.
