Almaniyanın xarici işlər naziri vəzifəsini Yohan David Vadeful tutacaq. 62 yaşlı siyasətçi ölkənin yeni kansleri Fridrix Merzin yaxın silahdaşı hesab edilir.
Sağ-mərkəzçi Xristian Demokrat İttifaqının (CDU) nümayəndəsi olan Vadeful Yaşıllar Partiyasından olan Annalena Berboku əvəz edəcək. Sağ-mərkəzçi partiyalarla (CDU/CSU) sol-mərkəzçi Sosial Demokratların (SPD) yeni koalisiya hökuməti mayın 6-da and içəcək.
Modern.az-ın məlumatına görə, Vadeful Azərbaycan üçün yad sima deyil.
Şimal dənizi sahilindəki Husum bölgəsindən olan siyasətçi 2009-cu ildən Bundestaqda deputatdır. Vadeful Almaniya Bundestaqının Xristian-Demokrat/Xristian-Sosialist İttifaqı fraksiyasının xarici, təhlükəsizlik və müdafiə siyasəti üzrə sədr müavini, Almaniya-Cənubi Qafqaz parlament qrupunun sədri vəzifəsini tutub.
Vadeful bu vəzifədə bir neçə dəfə Azərbaycan rəsmiləri görüşüb. Deputat kimi ötən il Münhen Təhlükəsizlik Konfransında Prezident İlham Əliyevlə görüş keçirib.
O, Vətən müharibəsindən əvvəl dəfələrlə Qarabağın işğal olunmuş Azərbaycan ərazisi olduğunu bildirib. “Bir məsələ aydındır: Azərbaycan ərazisi Ermənistan tərəfindən qeyri-qanuni işğal edilib”, - o, Xocalı qırğınının 27-ci ildönümü münasibətilə Almaniya-Azərbaycan forumu, Azərbaycanın AFR-dəki səfirliyi və Almaniya Atlantik Cəmiyyəti tərəfindən Berlində təşkil edilmiş “Cənubi Qafqazda sabitlik və təhlükəsizlik: Almaniya-Azərbaycan tərəfdaşlığının perspektivləri” mövzusunda simpoziumda söyləyib.
Yeni nazir çoxsaylı diplomatik əlaqələrə malikdir və diplomatik konvensiyalarla tanışdır. "Mənim əsas diqqətim transatlantik əlaqələr və NATO, Çin və Rusiya, eləcə də Balkanlar və Yaxın Şərqlə əlaqələrdir", - Vadeful öz saytında qeyd edib.
O, son bir neçə həftə ərzində Parisə, Londona və Varşavaya səfər edərək orada xarici işlər nazirləri ilə görüşdü.
Vadeful xarici siyasət sahəsində təcrübəsindən əlavə, hərbi sahədə də biliklərə malikdir. Orta məktəbi bitirdikdən sonra 1982-1986-cı illərdə Bundesverdə hərbçi kimi xidmət edib və ehtiyatda olan polkovnik-leytenantdır. "Mənim Bundesverlə sıx əlaqələrim var", deyə o vurğulayır.
O, dəfələrlə silahlı qüvvələrin daha yaxşı təchiz edilməsinə və məcburi hərbi xidmətin bərpasına çağırıb.
Hərbi xidmətdən sonra Vadeful Kiel Universitetində hüquq təhsili alıb, doktorluq dərəcəsi alıbvə hüquqşünas kimi öz işini qurub.
1982-ci ildə XDİ-yə üzv olub və siyasi karyerasına partiyanın rayon şöbəsində başlayıb. O, 2000-ci ildən 2009-cu ildə Bundestaqa daxil olana qədər Şlezviq-Holşteyn əyalət parlamentinin üzvü olub. O, həyat yoldaşı və üç övladı ilə birlikdə Kiel əyalətinin paytaxtı yaxınlığında yaşayır. Asudə vaxtlarında xüsusilə Florensiya və Romaya səyahət etməyi xoşlayır, tarixlə maraqlanır.
Almaniyanın yeni baş diplomatını beynəlxalq səhnədə çətin vəzifələr gözləyir: Bir tərəfdən Rusiyanın Ukraynaya qarşı müharibəsi var. Kiyev Almaniyanın köməyinə arxalanmağa davam edə biləcək.
Vadeful namizədliyindən az sonra "Deutsche Welle"yə müsahibəsində bunu təsdiqləyib. “Düşünürəm ki, biz Ukraynanın tərəfindəyik, başda Vladimir Putin olmaqla, iştirak edən hər kəsə aydın olmalıdır. Biz Ukraynanı dəstəkləyəcəyik”, - Vadeful bildirib.
Elnur Əmirov
