Şimali Kipr Türk Respublikasının (ŞKTR) Girnə şəhərində Türk Dövlətləri Təşkilatının (TDT) Ağsaqqallar Şurasının 17-ci toplantısı keçirilib.

Modern.az-ın məlumatına görə, görüşdə TDT Ağsaqqallar Şurasının sədri Binali Yıldırım, TDT-nin baş katibi Kubanıçbek Ömürəliyev, ev sahibi qismində ŞKTR ağsaqqalı İsmayıl Bozkurt, Azərbaycan ağsaqqalı Həsən Həsənov, Qazaxıstan ağsaqqalı İkram Adırbek, Qırğızıstan ağsaqqalı Apas Jumagulov, Özbəkistan ağsaqqalı Sadıkcan Turdiyev və təşkilatın müxtəlif orqanlarının nümayəndələri iştirak ediblər.

TDT Ağsaqqallar Şurasının rəhbəri Binali Yıldırım toplantının ŞKTR-də keçirilməsinin xüsusi mənası olduğunu vurğulayıb. Onun sözlərinə görə, ŞKTR 2022-ci ildə Səmərqənd Sammitində TDT-nin müşahidəçi üzvü statusu əldə etdikdən sonra təşkilat daxilində fəal iştirak edir. Yıldırım, həmçinin ŞKTR-nin bu il “TEKNOFEST” aviasiya, kosmos və texnologiya festivalına ev sahibliyi etdiyini xatırladıb və bu festivalın Türkiyənin texnologiya və müdafiə sənayesindəki inkişafını nümayiş etdirdiyini qeyd edib.

Yıldırım çıxışında Türk dünyasının ortaq layihələrinə yeni güc və impuls qazandırmağın vacibliyini vurğulayıb. O, Bişkek Zirvəsində “Hər kəs üçün təhlükəsizlik” şüarı altında Türk Dünyası 2040 vizyonunu həyata keçirəcək 16 mühüm sənədin imzalandığını bildirib.

Xüsusilə Orta Dəhlizin əhəmiyyətinə toxunan Yıldırım bu nəqliyyat marşrutunun Şərq-Qərb ticarətində vaxt və xərc baxımından önə çıxdığını, tarixən də mühüm rol oynadığını deyib. Onun sözlərinə görə, Orta Dəhlizin səmərəli istifadəsi Türk dövlətləri arasında iqtisadi inteqrasiyanı gücləndirəcək, rifahı artıracaq və enerji təhlükəsizliyinə töhfə verəcək.

Binali Yıldırım bölgədəki TDT üzvü ölkələrin zəngin təbii qaz və karbohidrogen ehtiyatlarına malik olduğunu xatırladaraq, son illər iqlim dəyişikliyinin yaratdığı problemlərin daha qabarıq hiss olunduğunu vurğulayıb. O, bu kontekstdə Azərbaycanın paytaxtı Bakıda keçirilən BMT-nin İqlim Dəyişikliyi üzrə COP29 konfransında bu məsələlərin geniş şəkildə müzakirə olunduğunu bildirib.

Yıldırım TDT-nin 20–22 may tarixlərində Macarıstanın paytaxtı Budapeştdə keçiriləcək qeyri-rəsmi liderlər zirvəsinə də toxunaraq, burada Özbəkistanın Türk Mədəniyyəti və İrsi Fonduna üzv olması, Türkmənistanın isə Türk Akademiyası və eyni fonda müşahidəçi üzv qismində qəbul olunmasının gözlənildiyini deyib.

Toplantıda ortaq türk əlifbası layihəsinin yekunlaşdığı və 34 hərfdən ibarət sistemin üzv dövlətlərə təqdim edildiyi açıqlanıb. Binali Yıldırım həmçinin ortaq türk tarixinin yaradılmasının vacibliyini qeyd edib və bu tarixin bütün ortaq dəyərləri əhatə etməli olduğunu bildirib.

Yıldırım çıxışının sonunda Şimali Kiprdə Ağsaqqallar Şurasının toplantısının keçirilməsinin, son zamanlarda Şimali və Cənubi Kipr üzərindən TDT-yə yönəlmiş təbliğatlara ən güclü cavab olduğunu vurğulayıb. Toplantı mətbuata qapalı şəraitdə davam edib və burada təşkilatın fəaliyyətlərinin qiymətləndirilməsi, yeni yol xəritələri, ortaq tarix, ortaq əlifba və aşağı orbitli peyk texnologiyası kimi məsələlər müzakirə olunub.

Ağsaqqallar Şurası, TDT-nin Zirvə və Xarici İşlər Nazirləri görüşlərindən sonra üçüncü ən yüksək qərarverici orqan sayılır. Onun 17-ci toplantısının məhz Şimali Kiprdə keçirilməsi Türk dünyasının həmrəyliyi baxımından simvolik əhəmiyyət daşıyır.