Rusiya dövlət televiziyası VGTRK-nin jurnalisti Pavel Zarubin “Rusiya. Kremlin. Putin. 25 il” adlı yeni sənədli filmdən kadrlar yayımlayıb.
Modern.az xəbər verir ki, filmdə Vladimir Putinin 25 illik hakimiyyət dövründə şəxsi həyatına və fəaliyyətinə dair məlumatlar yer alıb.
Filmdə yer alan fraqmentlərdən birində Putin “bu illər ərzində heç şübhəniz və ya "nəyə görə bütün bunlar mənim başıma gəlir" hissiniz olubmu?” sualını gülümsəyərək cavablayır: “Xeyr, heç vaxt olmayıb.”
Putin həmçinin gündəlik həyatından da danışıb. Bildirib ki, əksər hallarda özü oyanır, lakin bəzi hallarda ciddi hadisələr olduqda, əməkdaşlardan onu vaxtında oyatmalarını xahiş edir. “Bəzən uşaqlar zəng edir, əgər hansısa ciddi məsələdirsə — mən öncədən zəng etmələrini xahiş edirəm. Amma adətən özüm oyanıram,” — deyə o qeyd edib.
VGTRK çəkiliş qrupu Kremlin daxilində yerləşən prezident mənzilini də ziyarət edib. Putin burada Çin lideri Si Cinpin və sabiq ABŞ prezidenti Bill Klintonla çay içdiyi kamin qarşısını göstərib. Həmçinin mətbəx və soyuducunun içi, evdəki şəxsi kilsə, piano və kitabxana da nümayiş olunub.
“Rusiya. Kremlin. Putin. 25 il” sənədli filmi 4 may tarixində “Rossiya 1” telekanalında yayımlanacaq.
