Amerika Psixoloji Assosiasiyasının (APA) apardığı yeni araşdırmaya görə, dünyanın müxtəlif ölkələrində yaşayan insanların əksəriyyəti həyatın yaxşılığa yaxşılıqla, pisliyə isə cəza ilə cavab verdiyinə inanır.
Tədqiqat çərçivəsində ABŞ, Sinqapur və Hindistanda yaşayan, müxtəlif dini baxışlara malik və heç bir dini inancı olmayan 2 mindən çox insan arasında sorğu keçirilib.
Modern.az-ın məlumatına görə, nəticələr "Psychology of Religion and Spirituality" (Din və Mənəviyyat Psixologiyası) jurnalında dərc olunub.
Sorğuda iştirak edənlərin 59 faizi həyatlarında yaxşı əməllərinin mükafatlandırıldığını qeyd edib. Respondentlərin 92 faizi isə başqaları haqqında danışarkən, pis hərəkət edən tanışlarının – məsələn, borc qaytarmayan dostların, məsuliyyətsiz iş yoldaşlarının və ya onları incidən insanların — cəzalandığını və uğursuzluğa düçar olduğunu vurğulayıb. Qeyd olunub ki, bu inanc həm müxtəlif dinlərə mənsub olan dindar insanlarda, həm də ümumiyyətlə tanrıya inanmayanlarda eyni dərəcədə güclüdür.
Araşdırma müəllifləri qeyd edir ki, Qərb ölkələrindən olan respondentlər özlərini və davranışlarını daha müsbət qiymətləndirib, Asiya ölkələrindən olanlar isə daha çox özünütənqidə meylli olub.
Elnur Əmirov
